Bu mövsüm həm Avropada, həm də Türkiyə çempionatında inamlı təsir bağışlayan və hazırda 20 oyunluq məğlubiyyətsiz seriyaya malik olan ''Qalatasaray'' təcrübəli liderlərini buraxmaq istəmir. Söhbət ilk növbədə Fernando Muslera ilə Dris Mertensdən gedir.

Musleranın mövsümün sonunda ayrılaraq vətəni Uruqvaya yollanacağı və karyerasını bitirəcəyi barədə uzun müddətdi, söz-söhbətlər gəzir. Hətta bu üzdən rəhbərliyin qapıçı axtarışlarına başladığı da iddia edilmişdi. Amma məlum olub ki, ''Cim-Bom'' Musleranı fikrindən daşındırmağa və onu daha bir il klubda saxlamağa çalışır. Martdan etibarən danışıqlar gücləndiriləcək.

Bu arada Uruqvayın köklü klublarından olan ''Penyarol''un da 38 yaşlı qapıçıya ciddi maraq göstərməsi haqda xəbərlər yayılıb. Muslera heç də pis formada deyil və aydın məsələdi ki, o ən azı 1 il də yüksək səviyyədə oynamağa qadirdi.

2011-dən ''Qalatasaray''ın şərəfini qoruyan Muslera indiyə qədər bu klubda 530 rəsmi oyunda forma geyib və bunların 187-də qapısını toxunulmaz saxlayaraq ümumilikdə 570 qol buraxıb. Mertensin durumu isə ötən mövsümkü vəziyyəti xatırladır. Təcrübəli belçikalı ulduz ötən il də mövsümün sonunda karyerasını bitirməyi planlaşdırırdı. Amma o, uğurlu performans sərgiləyincə və tərəflər anlaşma əldə edincə daha bir mövsüm də klubda qalmağa qərar vermişdi.

Bu mövsüm Mertens yenə ümidləri doğruldur. Bu üzdən rəhbərlik ona növbəti dəfə birillik müqavilə təklif edib. Elə Okan Buruk da 37 yaşlı futbolçunun daha bir il qalmasını çox istəyir. Amma Mertens rəhbərliyə ''mövsüm bitsin, o zaman vəziyyətə baxarıq'' cavabını verib.

''Qalatasaray''la artıq iki çempionluq yaşayan bu futbolçu cari mövsümdə 25 rəsmi oyunda meydana çıxaraq 5 qol, 12 məhsuldar ötürmə ilə fərqlənib.

ƏLİ