Bu həftəsonu çempionluq şansını rəsmən itirəcəyi gözlənilən ''Fənərbaxça'' yavaş-yavaş yeni mövsümün planlarını cızır. Hərçənd yeni mövsümdə nə indiki rəhbərliyin, nə də Joze Mourinyonun komandada olub-olmayacağı bilinmir.

Bu arada ''Fənər''in əsas qanayan yarasına çevrilən Çempionlar Liqasının təsnifat mərhələsində qət edəcəyi yol ilə bağlı bəzi detallar bəlli olub. Bilindiyi kimi bu mövsümün çempionu ÇL-də birbaşa əsas mərhələyə vəsiqə qazanacaq, 2-ci pillənin sahibi isə mübarizəyə 2-ci təsnifat mərhələsindən başlayacaq. Bu mərhələdə problem yaşayacağı gözlənilməyən ''sarı-lacivərdlilər''in 3-cü təsnifat mərhələsində isə ''səpələnmişlər'' arasında yer alıb-almamasından çox şey asılı olacaq. Komandanın ''səpələnmişlər'' arasında yer alması üçün isə 4 şərtdən 3-ü reallaşmalıdı.

Bəs bu şərtlər hansıdı? ''Lill'' Fransa çempionatında 4-cü pilləni tutmamalı, ''Utrext'' Niderland çempionatında bürünc medalları qazanmamalı, ''Brügge'' Belçika çempionatında 2-ci pilləni tutmamalı və eyni şəkildə ''Zaltsburq'' Avstriyada 2-ci olmamalıdı. Məhz bu ehtimallardan 3-ü reallaşacağı təqdirdə İstanbul nəhəngi əsas gəlir mənbəyi sayılan ÇL-də 3-cü təsnifat mərhələsində nisbətən asan rəqiblə qarşılaşacaq. Amma komanda püşkatmada ''səpələnmişlər'' sırasında yer almasa, ''Feyenoord'', ''Brügge'', ''Reyncers'', ''Benfika'' və ya ''Sportinq'' kimi güclü rəqiblərdən biri ilə qarşılamalı olacaq.