''Fənərbaxça'' dünən Çempionlar Liqasının 2-ci təsnifat mərhələsinin cavab oyununda ''Luqano'' ilə qarşılaşdı.

“Football-plus.az” xəbər verir ki, İstanbul nəhəngi Joze Mourinyonun ilk rəsmi ev oyununda çətinliklə də olsa, qalib gəlməyi bacardı. İsveçrəlilər artıq 7-ci dəqiqədə Mohamed Mahmudun qolu ilə hesabda önə keçdilər. İlk yarıda inamsız təsir bağışlayan ''Fənər'' fasilədən sonra vəziyyəti lehinə dəyişə bildi. Ceko 59-cu dəqiqədə başla hesabı bərabərləşdirdisə, son anlarda Şimanski Tadiçin ötürməsindən sonra topu boş qapıya göndərdi. Beləliklə, ''Fənər'' iki oyunun nəticəsinə görə 6:4 qalib gələrək növbəti mərhələyə vəsiqə qazandı. 3-cü təsnifat mərhələsində rəqib Fransa təmsilçisi ''Lill'' olacaq. ''Luqano'' ilə cavab oyununda həm Mourinyonun, həm də ''sarı-lacivərdlilər''in seriyaları davam etdi.

Mourinyo məşqçi kimi avrokubokların təsnifat mərhələlərində keçirdiyi 7-ci oyundan da qələbə ilə ayrıldı. Portuqaliyalı mütəxəssisin vətənində çalışdırdığı klublar istisna olmaqla yeni kollektivlərin başında ilk rəsmi ev oyunundan qələbə ilə ayrılması ənənəsi də davam etdi. Ünlü mütəxəssis buna qədər ''Çelsi'', ''Real'', ''İnter'', ''Mançester Yunayted'' və ''Tottenhem''in başında da evdəki ilk rəsmi oyunlardan qələbə ilə ayrılmışdı. ''Fənərbaxça'' isə buna qədər tarixi ərzində avrokubokların pley-off və təsnifat mərhələlərində ilk oyunda səfərdə qalib gəldiyi 9 halın hamısında mərhələni adlanmağı bacarmışdı. Bu seriya ''Luqano'' ilə dueldə də davam edərək 10-a yüksəldi.

ƏLİ