“Fənərbaxça” Türkiyədə bu yayın ən hay-küylü transferlərindən birini reallaşdırmağa çox yaxındı.

“Fənər”in Mərakeş yığmasının və “Sevilya”nın ulduzu Yussef Ən-Nəsiri ilə ilə anlaşdığını xəbər vermişdik. Daha sonra futbolçu qərar verməkdə çətinlik çəkdiyinə görə başqan Əli Koç bir qədər sərt formada ona düşünmək üçün 48 saat verdiyini bildirmişdi. Həm Koçun ultimatumu, həm də Joze Mourinyonun şəxsən zəng vurub Ən-Nəsiri ilə danışması işə yaradı. “Estadio Deportivo”nun xəbərinə görə tərəflər arasında artıq 4 illik anlaşma əldə olunub. Bu transfer “sarı-lacivərdlilər”ə 18 milyon avroya başa gələcək. “Fənər” bu məbləği 16 hissəyə bölərək 4 il ərzində ödəyəcək. Müqavilədə maksimum 7 milyon avroya çatan performans bonusları da mövcuddu. Məsələn, Ən-Nəsiri 4 il ərzində hər mövsüm 20-dən çox qol vursa, “Fənər” əndəlüslərə 1 milyon avro bonus ödəyəcək. Ötən mövsüm “Sevilya”nın heyətində 41 rəsmi oyunda 20 qol, 3 məhsuldar ötürmə ilə fərqlənən 27 yaşlı futbolçu dünən axşam saatlarında İstanbula ayaq basmalıydı.

Bu arada “Fənərbaxça”nın “Luqano” ilə oyun üçün UEFA-ya göndərdiyi iştirak ərizəsi məlum olub. Bilindiyi kimi, Mourinyonun komandası Çempionlar Liqasının 2-ci təsnifat mərhələsinin ilk oyunu çərçivəsində bu gün İsveçrədə “Luqano”nun qonağı olacaq. Oyun Bakı vaxtı ilə saat 22.30-da başlayacaq. Mourinyonun qərarı ilə 9 futbolçunun adı iştirak ərizəsinə salınmayıb. Söhbət Cengiz Ündər, Ləvənt Mərcan, Əmrə Mor, Luan Peres, Miha Zayts, Migel Krespo, Samet Akaydın, Umut Nayır və Burak Kapacakdan gedir. Ən böyük sürpriz bu siyahıda Cengizin olmasıdı. Əslində “Fənər”in ötən yay 15 milyon avroya transfer etdiyi türkiyəli vingerin bu yay komandasını dəyişəcəyi barədə çox söz-söhbət dolaşırdı. Görünür, o, həqiqətən də məşqlərdə özünü Mourinyoya göstərə bilməyib. Bugünlərdə “Napoli”nin Cengizə maraq göstərməsi barədə xəbərlər də peyda olmuşdu. Əvəzində Mourinyonun yoxlama oyunlarında israrla şans verdiyi Rayan Kentin adı iştirak ərizəsinə salınıb. Onun isə komandadan ayrılacağı gözlənilirdi. Amma belə getsə, Mourinyo ingiltərəli vingerin komandada qalmasını tələb edəcək. Bundan başqa, daha iki futbolçu adı iştirak ərizəsində olduğu halda, İsveçrəyə aparılmayıb. Bunlar qapıçı İrfan Can Eğribayat ilə yeni transfer Allan Sent-Maksimindi. Bazar günkü məşqdə ayağından yüngül zədə alan Sent-Maksimin dünənki məşqə çıxmadı. Bu üzdən Mourinyo onun durumu ilə riskə getmək istəmədi.

Onu da vurğulayaq ki, “Fənərbaxça”nın potensial rəqibləri bəlli olub. İstanbul nəhəngi “Luqano” maneəsini aşacağı təqdirdə ÇL-in 3-cü təsnifat mərhələsində Fransa təmsilçisi “Lill” ilə qarşılaşacaq. İlk oyun Fransada, cavab görüşü Türkiyədə keçiriləcək. Ötən mövsümü Liqa-1-də 4-cü pillədə tamamlayan “Lill”də məşqçi dəyişikliyi baş verib. “Milan”a yollanan portuqaliyalı Paulo Fonsekanı Bruno Jenezio əvəzləyib. “Fənərbaxça” “Luqano” səddini aşa bilməyəcəyi təqdirdə isə mübarizəni Konfrans Liqasının 3-cü təsnifat mərhələsində davam etdirəcək. Orda Mourinyonun komandası Kiyev “Dinamo”su ilə “Partizan”ın duelinin qalibi ilə qarşılaşacaq.