Okan Burukun başçılığı altında mövsümü mükəmməl keçirərək 23-cü çempionluğunu qazanan “Qalatasaray” yavaş-yavaş diqqətini avrokuboklara yönəldir.

"Football-plus.az" xəbər verir ki, bilindiyi kimi, bu mövsüm Çempionlar Liqasının finalçıları “Mançester Siti” ilə “İnter” öz daxili çempionatlarında ilk “4-lüy”ə düşərək ÇL-ə vəsiqə qazandığından “Qalatasaray” bu turnirdə mübarizəyə 1-ci yox, 2-ci təsnifat mərhələsindən start verəcək. Eynilə “Cim-Bom” kimi mübarizəyə 2-ci təsnifat mərhələsindən başlayacağı dəqiq olan digər klublar isə Norveç təmsilçisi “Molde”, Danimarka təmsilçisi “Kopenhagen”, Xorvatiyadan Zaqreb “Dinamo”su və Cənubi Kipr təmsilçisi “Aris”di. İstanbul nəhəngi 2-ci təsnifatda mübarizə aparacaq 20 klub arasında UEFA-da ən yaxşı reytinqə malik 3-cü klubdu. “Sarı-qırmızılar” yalnız Zaqreb “Dinamo”su və “Kopenhagen”dən geri qalır. Ona görə də “Qalatasaray” 2-ci təsnifat mərhələsinin püşkatmasında “səpələnmişlər” sırasında yer alacaq. 1-ci təsnifatda ümumilikdə 30 klub mübarizə aparacaq. Onlardan 15-i 2-ci təsnifata yüksələcək. Bu 15 klubdan 10-u böyük ehtimalla “Qalatasaray”ın mümkün rəqibləri arasında olacaq. Bura George Hacinin çalışdırdığı Rumıniya çempionu “Farul” və hətta çempionumuz “Qarabağ” da daxildi. Amma bunun üçün qeyd etdiyimiz kimi, ilk növbədə 1-ci mərhələni keçmək tələb olunur. “Qalatasaray” iyulun 25-26-da başlayacaq 2-ci təsnifat mərhələsini keçsə, avqustun 8-9-da başlayacaq 3-cü təsnifat mərhələsində Çempionlar Yolu ilə irəliləyən 12 kollektivdən biri olacaq. Mübarizəyə 3-cü mərhələdən başlayacağı dəqiq olan Yunanıstan çempionu AEK ilə Çexiya çempionu “Sparta”nın reytinq xalı “Qalatasaray”dan aşağıdı. Ona görə də Okan Burukun kollektivi bu mərhələdə yenə “səpələnmişlər” sırasında olacaq və nisbətən zəif rəqiblə qarşılaşacaq. Avqustun 22-23-də başlayacaq pley-offda isə ehtimallara görə reytinq xalı “Qalatasaray”dan yüksək olan cəmi 3 klub olacaq. Onlardan biri İsveçrə çempionu “Yanq Boyz”du. Məsələn, Belçika çempionu “Antverpen”in reytinqi daha aşağıdı. Ona görə də “Qalatasaray” pley-offda da 99 faiz “səpələnmişlər” arasında yer alacaq. Qısası, “Cim-Bom”un 2019/20-dən bəri ilk dəfə ÇL-in qrupuna düşmək üçün çox yaxşı şansı var.

Onu da xatırladaq ki, “Aslan” bu mərhələlərdən hər hansı birində uduzsa, avtomatik Avropa Liqasına, orda da məğlub olsa, Konfrans Liqasına keçəcək.