Türkiyə kubokunun böyük maraqla gözlənilən final matçı keçirildi.

Qaziantep şəhərində ''Trabzonspor''la ''Qalatasaray'' üz-üzə gəldi. İstanbul nəhəngi favorit statusunu asanlıqla dogruldaraq növbəti dəfə hazırda Türkiyə futbolunda hegemonluq etdiyini göstərdi.

''Cim-Bom'' Barış Alpər Yılmazın erkən qolu ilə fasiləyə üstün yollandı. İkinci hissəyə isə Viktor Osimhen damğa vurdu. Mövsümboyu önəmli qollar vuran nigeriyalı qoleador finalda da səhnəyə çıxdı. Onun dublu sayəsində hesab darmadağın həddinə çatdı və ''sarı-qırmızılar'' 3 cavabsız qolla qalib gəldilər. Osimhen iki rekord birdən yenilədi. O, 39-cu rəsmi oyununda vurduğu qolların sayını 35-ə çatdırdı. Bununla da 26 yaşlı futbolçu 2000/01-də 43 oyuna 34 qol vuran Mario Jardeli geridə qoydu və klub tarixində bir mövsümə ən çox qol vuran əcnəbi futbolçuya çevrildi!

Bundan başqa Osimhen ''Qalatasaray''ın heyətində kubokun finalında iki qol birdən vuran ilk əcnəbi futbolçu oldu. Bu turnirdə onsuz da rəqib tanımayan ''Qalatasaray'' kuboku 19-cu dəfə qazanmaqla öz rekordunu bir qədər də yaxşılaşdırdı. İkinci pillədə qərarlaşan ''Beşiktaş'' bu turniri 11 dəfə qazanıb. 17-ci dəfə həlledici oyunda iştirak edən ''Trabzonspor'' isə ardıcıl 2-ci, ümumilikdə 10-cu dəfə finalda məğlub oldu. Komanda ötən mövsümkü finalda ''Beşiktaş''a uduzmuşdu (2:3). Amma finalda məğlubiyyət sayı baxımından antirekord ''Fənərbaxça''dadı. ''Sarı-lacivərdlilər'' iştirak etdikləri 18 finalın 11-dən üzgün ayrılıblar.

Bundan başqa ''Qalatasaray'' kubokda ardıcıl 8-ci (!) finaldan qalib ayrılmaqla möhtəşəm seriyasını davam etdirdi. Son illərdə bir sıra rekordları yeniləyən Okan Buruk bu dəfə də bəzi mühüm göstəricilərə nail oldu.

Daha öncə ''Akhisarspor''un başında bu titulu qazanan Buruk iki fərqli klubla kuboku qazanan 5-ci məşqçi oldu. Daha öncə bunu Aykut Kocaman (Konyaspor, Fənərbaxça), Necdet Niş (Fənərbaxça, Sakaryaspor), Samet Aybaba (Gənclərbirliyi, Trabzonspor) və Mustafa Dənizli (Qalatasaray, Beşiktaş) bacarmışdı. Ən əsası futbolçu kimi 5, məşqçi kimi 2 dəfə bu turnirdə zəfər yaşayan Buruk kuboku ümumilikdə ən çox (7 dəfə) qazanan futbol adamı kimi Türkiyə futbolu tarixinə düşdü.

Qeyd edək ki, Buruk superliqada da buna bənzər rekordun sahibidi. O, futbolçu kimi 7, məşqçi kimi 3 dəfə olmaqla Türkiyə çempionatını ən çox (10) qazanan futbol adamı statusundadı. Bu rekordunu bu həftəsonu qazanacağı növbəti çempionluqla yeniləyəcəyi gözlənilir.