Türkiyə çempionatının 34-cü turunda lider ''Qalatasaray'' ''Sivasspor''u qəbul etdi.

''Football-plus.az'' xəbər verir ki, zəif mövsüm keçirən və elitada qalmaq uğrunda mübarizə aparan Sivas təmsilçisi güclü rəqibinə qarşı meydanda heç bir varlıq göstərə bilmədi. İstanbul nəhəngi Lukas Torreyra, Barış Alpər Yılmazın qolları və Viktor Osimhenin dublu sayəsində 4:1 hesablı inamlı qələbə qazandı.

Maraqlıdı ki, 5 qolun hamısı ilk 33 dəqiqəyə təsadüf etdi. ''Cim-Bom'' üçün yeganə üzücü məqam komandanın evdə qol buraxmamaq seriyasının qırılması oldu. Komanda bu matçda da qapısını toxunulmaz saxlayacağı təqdirdə superliqada ardıcıl 6-cı ev oyununda bunu bacaracaqdı ki, bu da ''Qalatasaray''ın son 40 ildə ən yaxşı seriyası olacaqdı.

Qollardan doymayan Osimhen ''sarı-qırmızılar''ın heyətində 37-ci rəsmi oyunda vurduğu qolların sayını 33-ə çatdırdı. Nigeriyalı forvard bununla da şəxsi rekordunu yeniləmiş oldu. Klub tarixində bir mövsümə ən çox qol vuran əcnəbi futbolçuların siyahısında isə Osimhen Bafetimbi Qomis (32) ilə Mauro İkardini (32) geridə qoydu. İndi o, bu siyahıda yalnız Mario Jardeldən (34) geri qalır. Bundan başqa Osimhen 24 qolla superliqada bombardirlər yarışına başçılıq edir. Rəsmi matçlarda ardıcıl 6-cı, son 9 oyunda isə 8-ci qələbəsini qazanan ''Qalatasaray'' xalını 83-ə yüksəltdi. 75 xalı olan ''Fənərbaxça'' bu gün ''Beşiktaş''la qarşılaşacaq.

Onu da bildirək ki, ''sarı-qırmızılar'' bu mövsüm evdə uduzmayan yeganə komanda statusundadı. 32 oyuna 82 qol vuran ''Qalatasaray'' həm də tarixinin ən məhsuldar ikinci mövsümünü keçirir. Komandanın 32 oyundan sonra yalnız bir dəfə - 1998/99-da indikindən daha çox (84) qolu olub.