Milli Basketbol Assosiasiyası “Denver”in mərkəz oyunçusu Nikola Yokiçin 2023/24 mövsümünün ən dəyərli oyunçusu (MVP) sayıldığını elan edib. 29 yaşlı serb son 4 ildə 3-cü dəfə bu mükafatı qazanıb. Liqanın mətbuat xidmətinin açıqlamasında deyilir ki, Yokiç əvvəllər MBA-da görmədiyimiz uğurları qazanmaqda davam edir.

Yokiç MVP mükafatlarının sayına görə Larri Berd, Mecik Conson və Mozes Meloun ilə bərabərləşib. Bu göstəricidə rekordçu Kərim Əbdül-Cabbardı – 6 dəfə. Maykl Cordanla Bill Rassel 5, Uilt Çemberlenlə Lebron Ceyms 4 dəfə mövsümün ən dəyərli oyunçusu sayılıb.

Yokiç yenicə başa çatan müntəzəm çempionatda 79 oyuna çıxıb, hər oyunda orta hesabla 26,4 xal, 12,4 ribaund və 9 məhsuldar ötürmə ilə yadda qalıb. Onun oyundan atışlarının dəqiqlik faizi 58,3-ə, üçxallıq atışlarının dəqiqlik faizi isə 35,9-a bərabərdi. Qərb konfransında 2-ci yeri tutan “Denver” pley-offun ilk mərhələsində “Leykers”ə qalib gəlib və indi 2-ci mərhələdə “Minnesota” ilə mübarizə aparır.

Dünyanın bütün başqa çempionatlarında olduğu kimi, MBA-da da uğursuzluq halında yada düşən ilk şəxs baş məşqçi olur. “Finiks” Frenk Vogeli baş məşqçi vəzifəsindən qovmağa qərar verib. 50 yaşlı amerikalı komanda ilə yalnız bir mövsüm çalışıb. Ümumiyyətlə, “Finiks” son üç ildə 2-ci məşqçi ilə vidalaşıb. 2023/24 mövsümündə Qərb konfransında 6-cı yeri tutan “günəşlər” pley-offun ilk mərhələsində “Minnesota”ya uduzub. Artıq “Finiks”i kimin çalışdıracağı mövzusunda müzakirə də bitməkdədi. Klub rəhbərliyi bu posta Mayk Budenholtserin namizədliyini gözdən keçirir. Onunla danışıqlar həlledici mərhələyə qədəm qoyub. Budenholtserin sonuncu klubu 2018-23-cü illər aralığında çalışdırdığı “Miluoki” olub. O, 1996-2013 aralığında “San-Antonio”da Qreq Popoviçin yardımçısı olub, 2013-dən 2018-ə qədər isə “Atlanta”nı çalışdrııb. 54 yaşlı Budenholtser iki dəfə MBA-nən ən yaxşı məşqçisi sayılıb – 2014/15, 2018/19 mövsümlərində.

9 may
Nyu-York – İndiana 130:121 (36:36, 27:37, 36:18, 31:30)
Seriyada hesab – 2:0.

10 may
Boston – Klivlend 94:118 (24:30, 30:24, 24:36, 16:28)
Seriyada hesab – 1:1.
Oklahoma-Siti – Dallas 110:119 (32:36, 30:32, 27:31, 21:20)
Seriyada hesab – 1:1.