Mayın 8-də Avropa Liqasının (AL) finalçıları müəyyənləşdi.

"Football-plus.az" xəbər verir ki, ilk matçlarda inamlı qələbələr qazanan İngiltərə klubları cavab görüşlərində də qalib gələrək finala çıxdılar.

yarımfinal, cavab oyunları
Mançester Yunayted (İngiltərə) - Atletik (İspaniya) 4:1 (ilk oyun - 3:0)
Maunt, 72; 90+1. Kazemiro, 80. Heylunn, 85 - Xaureqisar, 31.
Mançester Yunayted: Onana, Mazraui (Şou, 62), Yoro, Maquayr, Lindelöff (Amass, 81), Uqarte (Diallo, 62), Kazemiro (Maynu, 81), Dorqu B.Fernandeş, Qarnaço (Maunt, 62), Heylunn.
Atletik: Aqirresabala, Qorosabel (De Markos, 62), Y.Alvares, Nunyes, Berçiçe, De Qalarreta (Prados, 61), Xaureqisar, Calo (Olabarryeta, 62), U.Qomes (Quruseta, 67), Berenger, Sannadi.

Liqa mərhələsini “Latsio” ilə birgə 19 xalla şərikli lider kimi başa vuran “Atletik”in doğma meydanında keçiriləcək finalda oynamaq şansı “Mançester Yunayted”ə evdə 0:3 hesabıyla uduzmaqla heçə enmişdi.

Xatırladaq ki, “San Mames”dəki gözlənilməz hesaba şərait yaradan əsas fakt müdafiəçi Vivianın qırmızı vərəqə almasına görə ev sahiblərinin 35-ci dəqiqədən sona qədər on nəfərlə oynaması olmuşdu. Buna baxmayaraq, bilbaolular Mançesterdə çox çətin vəzifənin öhdəsindən gələ biləcəklərinə ümid edirdilər. Ernesto Valverdenin komandası İngiltərədəki cavab oyununun ilk hissəsində yaxşı təsir bağışladı və fasiləyə Xaureqisarın qolu ilə üstün yollandı. Amma pireneylilər uğurlu çıxış davam etdirə bilmədilər.

Çempionlar Liqasına vəsiqə qazanmaq üçün yeganə çıxış yolunun məhz AL-də qələbə olduğunu bilən meydan sahibləri ikinci hissənin son 20 dəqiqəsində ardıcıl 4 qol vuraraq “Atletik”i yenə böyük hesabla məğlub etdilər. Ruben Amorimin komandası seriyasını 14 oyuna çatdırdı: İngiltərə nəhəngi cari mövsümdə AL-də 9 qələbə qazanıb, 5 matçı isə heç-heçə başa vurub. Amorimin ser Aleks Ferqyusonun ilk avrokubok mövsümündəki yolu ilə getdiyini də vurğulayaq: portuqaliyalı mütəxəssis baş məşqçi postuna təyinat alandan sonra komanda avrokubokda keçirdiyi 10 oyunda məğlub olmayıb (8 qələbə, 2 heç-heçə).

Bude/Qlimt (Norveç) - Tottenhem (İngiltərə) 0:2 (1:3)
Solanke, 63. Porro, 69.
Bude/Qlimt: Xaykin, Şevold, Qunnersen, Moe (Nilsen, 72), Byorkan, Evren, Berq, Saltnes (Euklenn, 72), Blomberq (Sörli, 61), Hauqe (Myaattya, 84), Hög (Helmersen, 61).
Tottenhem: Vikario, Porro, Romero, Van de Veen, Udoci, Bentankur, Bissuma, Conson (Sarr, 68), Kulusevski, Rişarlison (Tel, 61), Solanke.

“Qarabağ”ın vahid liqa mərhələsində Norveçdə 2:1 hesabıyla məğlub etdiyi “Bude/Qlimt”in avrokuboklarda ilk dəfə yarımfinala çıxmışdı. Kyetil Knutsenin komandası bu mərhələnin Londondakı ilk oyununda 1:3 hesabıyla uduzmuşdu. Qeyd edək ki, “Tottenhem” üçün də AL-də qələbə mövsümün qalan hissəsində ən vacib hədəfdi. İngiltərə daxilindəki yarışları boşa verən londonlular “Bude/Qlimt”i sfərdə də iki top fərqi ilə məğlub etdilər.

Beləliklə, AL-in finalında İngiltərə təmsilçiləri MY və “Tottenhem” qarşılaşacaqlar. Qalib komanda 2025/26 mövsümündə Çempionlar Liqasının (ÇL) əsas mərhələsinə vəsiqə qazanacaq. Başqa sözlə, ÇL-in növbəti mövsümündə İngiltərənin 6 klubu iştirak edəcək. Daha əvvəl premyer-liqada ilk 5 yeri tutan komandanın ÇL-də oynayacağı dəqiqləşmişdi. Hazırda bu mövqelərdə müvafiq olaraq “Liverpul”, “Arsenal”, “Nyukasl”, “Mançester Siti” və “Çelsi” qərar tutub. MY premyer-liqanın turnir cədvəlində 16-cı, “Tottenhem” 17-ci yeri tutur. Hər iki komanda ölkə çempionatı vasitəsilə ÇL-ə vəsiqə qazanmaq şansını itirib. Bu səbəbdən finalçılardan biri AL-in qalibi kimi ÇL-də oynamaq hüququna yiyələnəcək. Beləliklə, futbol tarixində ilk dəfə bir ölkə Avropanın ən nüfuzlu klub turnirində 6 komanda ilə təmsil olanacaq.

AL-in finalı mayın 21-də İspaniyanın Bilbao şəhərindəki “San Mames” stadionunda keçiriləcək.
Bombardirlər: B.Fernandeş (Mançester Yunayted), Hög (Bude/Qlimt), Əl-Kaabi (Olimpiakos) - 7, Heylunn (Mançester Yunayted), Varqa (Ferentsvaroş), Omorodion (Portu), Osimhen (Qalatasaray), Fofana (Lion), Çernı (Reyncers), Ən-Nəsiri (Fənərbaxça) - 6.