Misli premyer-liqasının 32-ci tur matçında “Sumqayıt”ın meydanından heç-heçə ilə ayrılan “Neftçi” mövsümü ilk “dördlük”də bitirmək şansını rəsmən itirdi. Deməli, ölkə kubokunda da mübarizəni dayandıran paytaxt təmsilçisinin avrokuboklara yollanmaq ehtimalı sıfra bərabərdi.

Odu ki, “ağ-qaralar” yeni mövsüm üçün heyət formalaşdırmaq prosesinə start verib.

“Football-plus.az”ın əldə etdiyi məlumata görə, bakılılar komandanı ölkəmizdə top qovan futbolçu ilə gücləndirmək istəyir. Söhbət “Şamaxı”nın futbolçusu Brahim Konatedən gedir. Fransalı futbolçu “şirlər”in heyətində göstərdiyi performans, oyun tərzi və nəticələr ilə baş məşqçi Samir Abasovun diqqətini cəlb edib. Mütəxəssis 29 yaşlı orta sahə oyunçusunu sərəncamında görməkdə israrlıdı.

Qeyd edək ki, Konate cari mövsüm ərzində premyer-liqada meydana çıxdığı 28 oyunda 8 qol, 3 məhsuldar ötürmə ilə yadda qalıb.

Maraq üçün xatırladaq ki, bölgə təmsilçisinin baş məşqçisi Ayxan Abbasov da “Neftçi”nin yetirməsi və hələ də şərəfini qorumağa davam edən Ağadadadaş Salyanskini “Şamaxı”da görmək istəyir.

KƏNAN BAHADIR