“Neftçi”nin futbolçusu Ağadadaş Salyanski mövsümün sonunda komandadan ayrılacaq.

“Football-plus.az”ın əldə etdiyi məlumata görə, “ağ-qaralar” yayda müqaviləsinin müddəti başa çatacaq futbolçuyla yola davam etmək niyyətində deyil. 20 yaşlı hücumçunun yeni komandası da bəllidi. Belə ki, o, karyerasını “Şamaxı”da davam etdirəcək.

Sövdələşmə “şirlər”in baş məşqçisi Ayxan Abbasovun istəyiylə baş tutub. U-21-in də çalışdırıcısı olan mütəxəssis gənc futbolçunun “Şamaxı”da - rəhbərliyi altında yığma üçün daha effektiv çıxış edə biləcəyini düşünür. Bölgə təmsilçisi oyunçuyla 2 illik müqavilə imzalamaq niyyətindədi.

Qeyd edək ki, “Şamaxı” daha bir neçə gənc futbolçuyla danışıqlar aparır. Ayxan bəy bunu özü Misli premyer-liqasının 31-ci turu çərçivəsində “Kəpəz”lə oyunsonrası mətbuat konfransında etiraf edib.

Onu da bildirək ki, Ağadadaş “Neftçi”nin yetirməsidi. O, bu mövsüm ölkə kubokunda keçirdiyi 4 oyunda 2 qol, premyer-liqada meydana çıxdığı 14 matçda isə 1 qol, 2 məhsuldar ötürmə illə yadda qalıb. Gənc futbolçu bu oyunlarda cəmi 766 dəqiqə meydanda olub.

KƏNAN BAHADIR