Yayda heyətində ciddi dəyişikliklər etməyə hazırlaşan “Neftçi” daha bir futbolçu ilə bağlı qərarını konkretləşdirib. Söhbət Yuri Matiasdan gedir.

“Football-plus.az”ın əldə etdiyi məlumata görə, “ağ-qaralar” 30 yaşlı mərkəz müdafiəçisiylə yolları ayıracaq. Braziliyalı futbolçunun, demək olar ki, bütün matçlarda, xüsusilə, “Qarabağ”a qarşı oyunlarda kobud səhvlərlə yadda qalması baş məşqçi Samir Abasovu qane etmir. Ümumiyyətlə, Matias həm də intizamsız futbolçudu. Premyer-liqada meydana çıxdığı 26 matçda 10 sarı vərəqə alan oyunçu bu üzdən iki dəfə cəzalı duruma düşüb.

O, cari “futbol ili”ndə meydana çıxdığı 4 ölkə kuboku oyununda 3 qol, 26 premyer-liqa görüşündə 2 qol, 1 məhsuldar ötürmə ilə yadda qalıb. 2023-cü ilin yayından paytaxt təmsilçisinin şərəfini qoruyan Matiasın klubla müqaviləsinin müddəti mövsümün sonunda başa çatacaq.

KƏNAN BAHADIR