Ötən il oktyabrın 14-də böyük ümidlərlə "Neftçi"nin baş məşqçisi təyin olunan Samir Abasov onu çətin günlərin gözlədiyindən xəbərdar idi. Buna rəğmən, "Sumqayıt"ı paytaxt təmsilçisinə dəyişəndən sonra yetərincə iddialı ifadələr işlətməklə diqqəti çəkdi.

İndiyə qədər arxdan çox su axsa da, dəyişən nəsə yoxdu. Hətta "ağ-qaralar"ın yerində saydığını desək, yanılmarıq. O başqa məsələ ki, bunu hansısa mətbuat konfransında Samir Abasovun üzünə desək, qəbul etməz. Həmin vaxtdakı əhvalından asılı olaraq, ya aqressiv cavab verər, ya da xanımların otağı tərk etməsini istəyər...

Bəs, Samir Abasov geridə qalan aylarda "Neftçi"də hansı uğurlara imza atıb? Qələbələrə göz gəzdirək.

Misli premyer-liqası
10-cu tur: "Neftçi" - "Səbail" 3:1
14-cü tur: "Neftçi" - "Zirə" 2:1
17-ci tur: "Neftçi" - "Kəpəz" 2:1
21-ci tur: "Neftçi" - "Şamaxı 1:0
22-ci tur: "Zirə" - "Neftçi" 1:2
24-cü tur: "Neftçi" - "Sumqayıt" 1:0
27-ci tur: "Səbail" - "Neftçi" 1:2

Ölkə kuboku
1/8 final: "Neftçi" - "Difai" 6:0
1/4 final, ilk oyun: "Kəpəz" - "Neftçi" 0:2
1/4 final, cavab oyunu: "Neftçi" - "Kəpəz" 1:0

Fikir verin, elitada "dişə vurulası" qələbələr yalnız "Zirə" üzərində qazanılıb. Qalan qələbələrdə rəqiblər premyer-liqada qalmaq uğrunda mübarizə aparan komandalar olub. "Səbail" mövsümün ən uğursuzu, "Kəpəz" isə premyer-liqanın ən kasıbıdı. Paytaxt təmsilçisi "Sumqayıt"ı yenəndə "kimyaçılar" 7 oyun idi ki, nə qol vura bilirdi, nə də qələbə qazana. "Şamaxı" isə 1-ci liqanın ötənilki çempionudu. Büdcəsi zəif, heyəti kasaddı. Qısası, bu qələbələrdə rəqibin durumunun payı daha çoxdu, nəinki Samir Abasovun əl işinin.

Ölkə kubokundakı vəziyyət də ürəkaçan deyil. Əvvəlki mərhələlərdə 1-ci liqanın və premyer-liqanın autsayderlərini məğlub edən "Neftçi" evdə "Sabah"a uduzmaqla finala vəsiqə qazanmaq şansını xeyli azaltdı. Baş hakim Əliyar Ağayevin məlum səhvi olmasaydı, 1:2 yox, 1:3 hesabıyla da uduza bilərdi. Bunlar öz yerində. Samir Abasov ciddi uğurlarla yadda qalmayıbsa, bəs nə ilə gündəmdə olub? Xatırlayın.

1. "Əsl "Neftçi"ni martın 22-də görəcəyik".
2. "Martın 22-si dedim, amma hansı il olduğunu demədim".
3. "İstefa verməliyəmmi, sizcə?"

İlk iki sitat jurnalistlərlə baş məşqçinin deyib-gülməsinə əsaslanırsa, sonuncu bir neçə gün ölkə gündəmini zəbt edən məlum söz davasının başlanğıc nöqtəsidi.

İndi "Neftçi"nin həm çempionat yoluyla, həm də kubok yoluyla avrokuboklara yollanmaq şansı qalıb. Amma çox cüzi. Sadəcə, Samir Abasov və komandası ən kiçik fürsətlərdən belə maksimum yararlanmalıdı. Bundan sonra yuxarıda qeyd olunanlarla xatırlanmaq əvəzinə daha ciddi uğurlar qazanmalıdı ki, yenidən bu məsələlərə qayıtmayaq.

KƏNAN BAHADIR

P.S. Ümid edək ki, "Neftçi" hansısa uğur qazansa, bu, hakim qərarları üzündən olmayacaq.