Dünən Konfrans Liqasının 2-ci təsnifat mərhələsinin “Sumqayıt” – “Fehervar” matçı ilə bağlı mətbuat konfransı keçirildi. “Kimyaçılar”ın baş məşqçisii Samir Abasov “komandadan ayrılanlar aparıcı oyunçular deyildi” sözləriylə şəxsən məni şoka saldı...

Bilindiyi kimi, “gənclik şəhəri”nin təmsilçisi mövsümlərarası dövrdə Erik Sorqa, Orxan Sadıqlı, Abu Dosso, Oktavio Manteka, Masaki Murata, Kamran Əliyev və Kasimir Ninqa ilə yolları ayırıb.

“Football-plus.az” olaraq, adı çəkilənlərin ötən mövsüm komanda üçün nə dərəcədə faydalı olduğunu dəqiqləşdirməyi lazım bildik.

Erik Sorqa – Estoniya millisinin üzvüdü. Premyer-liqada meydana çıxdığı 27 matçda 5 qol, 2 məhsuldar ötürmə, ölkə kubokunda keçirdiyi 3 oyunda isə 2 qol, 1 məhsuldar ötürmə ilə yadda qalıb.

Orxan Sadıqlı – qolkiper mövsüm ərzində cəmi 4 oyunda meydana çıxıb – ikisi premyer-liqada, ikisi ölkə kubokunda. Premyer-liqanın 10-cu turunda “Sabah”dan 3 qol buraxan qapıçı 11-ci turda “Kəpəz”lə oyunda keçilməz olub. Ölkə kubokunda “Karvan”dan 1 qol buraxıbsa, “Lerik”i əliboş göndərib. Vurğulayaq ki, bütün matçlarda əvvəldən axıra qədər oynayıb.

Abu Dosso - Kot d'İvuardan olan 28 yaşlı sol cinah müdafiəçisi mövsüm ərzində 32 matçda tər töküb. Premyer-liqada 29 oyun keçirib, 5 məhsuldar ötürmə verib. 3 kubok oyununa çıxıb.

Oktavio Manteka – 30 yaşlı yarımmüdafiəçi 26 premyer-liqa qarşılaşmasında 2 məhsuldar ötürmə verib, 3 kubok matçına çıxıb.

Masaki Murata – 24 yaşlı mərkəz yarımmüdaiəçisi ötən mövsüm 38 oyunda şans qazanıb. O, 35 premyer-liqa matçında 1 qol, 1 məhsuldar ötürməyə imza atıb. Üç dəfə ölkə kubokunda forma geyib.

Kamran Əliyev – 25 yaşlı yarımmüdafiəçi premyer-liqada meydana çıxdığı 31 matçda 2 qol, 4 məhsuldar ötürmə müəllifi olub. Ölkə kubokunda 4 matçda tər töküb, 1 qol vurub.

Kasimir Ninqa – Çad millisinin üzvünün 31 yaşı var. Mərkəz hücumçusu forma geydiyi 28 premyer-liqa matçında 7 qol vurubsa, 1 məhsuldar ötürmə verib. Ölkə kubokunda keçirdiyi 3 oyunda isə 1 qolla yadda qalıb.

Beləliklə, komanda iki milli üzvünü itirib. Həmçinin bu futbolçular “kimyaçılar”ın ötən mövsüm premyer-liqada vurduğu 37 qoldan 15-ni vurub, daha 15-də məhsuldar ötürmə verib. Bəs belədə yuxarıda xatırlatdığımız ifadəyə haqq qazandırmaq olarmı?

Samir bəy, böyük şəhərin tək komandasının böyük məşqçisindən böyük uğurlar gözləyirik, böyük yalanlar yox!

KƏNAN BAHADIR