İspaniya kubokunun finalının həyəcanı hələ də səngiməyib. Aprelin 26-da Sevilyada keçirilən matçda əzəli rəqibi “Barselona”ya 2:3 hesabıyla uduzan “Real”ın bir neçə oyunçusunu ağır cəzalar gözləyir.

Maraqlısı odu ki, madridlilərin üç futbolçusu – Antonio Rüdiger, Lukas Vaskes və Cud Bellingem matçın son dəqiqələrində yolverilməz hərəkət və davranışlarına görə qırmızı vərəqə alıblar. Onlar arasında Rüdigerin etdiyi hərəkətin cəzasının daha ağır olacağı ehtimal edilir.

Əksər mənbələr almaniyalı müdafiəçinin bir neçə oyunluq cəzadan qaça bilməyəcəyini vurğulayır. Buna səbəb onun hakim Rikardo De Burqos Benqoeçeaya hücum etməsi və ona kənar əşya atmasıdı. 110-cu dəqiqədə əvəzlənən Antonio epizodların birində referiyə kəskin etiraz da edib. Hakimin üzərinə getmək istəyən futbolçunu komanda yoldaşları sakitləşdiriblər. Rüdiger həmçinin ehtiyat oyunçular skamyasından hakimə buz torbası da atıb. Benqoeçea onu 120+3-cü dəqiqədə qırmızı vərəqə ilə cəzalandırıb. “Cadena Ser”in yaydığı məlumatda Rüdigerin bu hərəkət və davranışlarına görə 4 oyundan 12 oyuna qədər cəzalana biləcəyi qeyd edilir.

Bellingem hələ fasilə zamanı hakimlərdən birinə kəskin etiraz edib. İngilis futbolçu ona “niyə? Niyə? Bu ağılsızlıqdı! Get işinlə məşğul ol” deyib. “Movistar”ın məlumatına görə, Cud etirazını ehtiyat hakimə bildirib.

Yeri gəlmişkən, Bellingem La Liqanın fevralda “Osasuna” ilə keçirilən oyununda (1:1) hakim Xose Munuera Monteroya “get ******” dediyi üçün qırmızı vərəqə almış və iki matçlıq cəzaya məruz qalmışdı. Maraqlıdı, görəsən, bu dəfə cəzası necə olacaq?