Dünən İspaniya kubokunun yeni qalibi bəlli oldu.
Sevilya şəhərindəki ''La Kartuxa'' stadionunda ''Barselona'' ilə ''Real'' üz-üzə gəldi. ''Football-plus.az'' xəbər verir ki, bu mövsüm baş tutan sayca 3-cü ''El Klasiko'' da maraqlı və məhsuldar alındı.

İlk yarı Kataloniya nəhənginin böyük üstünlüyü şəraitində keçdi və komanda Pedrinin qolu ilə fasiləyə 1:0 öndə yollandı. Ancaq Mbappe və Arda Gülərin meydana çıxmasının ardından fəallaşan Madrid nəhəngi oyunda dönüş etməyi bacardı. 70-ci dəqiqədə Mbappe cərimə zərbəsindən hesabı bərabərləşdirdi. Maraqlıdı ki, ulduz futbolçu peşəkar karyerasında ilk dəfə cərimə zərbəsindən qol vurdu.

Çox keçmədən ''Real'' hətta 2-ci qolu da vurdu. Arda Gülərin künc zərbəsindən asması zamanı Çuameni başla fərqləndi. Amma ''kral klubu'' qələbə hesabını qoruya bilmədi və bu dəfə geridönüş növbəsi ''Barsa''ya çatdı. Ferran Torres qapısını lazımsız yerə tərk edən Kurtuanı geridə qoyaraq topu boş qapıya göndərdi və əsas vaxtt2:2-lik bərabərliklə yekunlaşdı.

İlk qolda olduğu kimi bu qolda da Yamal aktivinə məhsuldar ötürmə yazdı. Əlavə vaxta gedən qarşılaşmanın taleyini həll edən qol isə 115-ci dəqiqədə vuruldu. Modriçin yanlış ötürməsini ələ keçirən Kundenin zərbəsi Kurtua üçün əlçatmaz oldu. Oyunun sonları qırmızı vərəqələrlə əlamətdar oldu. ''Real''da 3 futbolçu - Rüdiger, Vaskes və final fitindən sonra Bellingem hakimə etiraza görə qırmızı vərəqə aldı. ''Real'' bu mövsüm rəsmi matçlarda 13-cü məğlubiyyətlə üzləşdi. Bu, Karlo Ançelottinin dönəmi üçün yeni antirekorddu.

''Barsa'' bu mövsüm 3-cü dəfə əzəli rəqibini məğlub etdi. ''Blauqrana'' daha öncə ilk dövrədə La Liqa çərçivəsində ''Real''ı səfərdə 4:0, yanvarda isə İspaniya superkubokunun finalında 5:2 hesabları ilə darmadağın etmişdi. Yəni Hans-Diter Flik Ançelottiyə qarşı keçirdiyi 3-cü dueldən də qalib ayrıldı (top fərqi - 12:4). Bu komandalar mayın 11-də La Liqada yenidən üz-üzə gələcək.

Yeri gəlmişkən, Flik məşqçi kimi indiyə qədər heç bir finalda uduzmayıb. ''Bavariya'' ilə 5, ''Barsa'' ilə 2 dəfə olmaqla 7 finalın hamısından qalib ayrılan almaniyalı mütəxəssis ümumilikdə 9-cu titulunu qazandı.

''Barsa''nın ölkə kubokunu 32-ci dəfə qazandığını və bu göstəricidə liderliyini bir qədər də möhkəmləndirdiyini bildirək. ''Atletiko'' bu turniri 24, ''Real'' 20 dəfə qazanıb.