La Liqanın 16-cı turunda ''Real'' ''Jirona''nın qonağı oldu.

Vinisiusun zədələnməsindən sonra daha çox oynamaq şansı qazanan Arda Gülər bu qarşılaşmada da start heyətində meydana çıxdı. Oyun həm Madrid nəhəngi, həm də gənc türkiyəli ulduz üçün uğurlu alındı. Bellingemin qolu ilə fasiləyə üstün yollanan ''Real'' 55-ci dəqiqədə Ardanın qolu ilə fərqi 2 topa yüksəltdi.

19 yaşlı futbolçu Bellingemin əla ötürməsindən sonra topu küncə göndərərək nəhayət, bu mövsüm ilk qolunu vurdu. Ötən mövsüm 12 rəsmi qarşılaşmada 6 dəfə fərqlənən Türkiyə yığmasının üzvü cari ''futbol ili''ndə buna qədər 16 rəsmi oyunda 486 dəqiqə meydanda olmuş və aktivinə yalnız 1 məhsuldar ötürmə yaza bilmişdi. Arda 17-ci oyunda şeytanın qıçını qırdı. Yekun nəticəni Mbappe müəyyənləşdirdi və ''Real'' 3:0 hesablı inamlı qələbə qazandı. Karlo Ançelotti oyundan sonra ''Arda çox çalışqan futbolçudu. Gənc olsa da, indidən üzərində böyük təzyiq va. Bu qol ona psixoloji cəhətdən çox yardım edəcək'' açıqlamasını verdi.

Yeri gəlmişkən, bu mövsüm zədələr üzündən bir xeyli əziyyət çəkən ''Real''da daha iki futbolçu zədələndi. Bellingem və Mendi oyunu məcburi tərk etməli oldu. Onların zədəsinin ciddiliyi barədə hələ ki, məlumat yoxdu.

ƏLİ