La Liqada ''Real'' lider ''Barselona''nın təqibini davam etdirir.

''Football-plus.az'' xəbər verir ki, 33-cü turda ''Barselona''nın evdə ''Malyorka''nı 1:0 məğlub etməsinin ardından ''Real'' səfərdə kiçik Madrid derbisində ''Xetafe''ni eyni hesabla məğlub etdi. Özü də Madrid nəhəngi üçün heç də asan keçməyən oyunda qələbə qolunu Arda Gülər vurdu.

Türkiyəli ulduz matçın yeganə qolunu 21-ci dəqiqədə vurdu. Onun asmasını müdafiəçilər uzaqlaşdırsa da, gənc futbolçu qayıdan topu yenidən ələ keçirdi. Bir müdafiəçini aldadıcı hərəkətlə keçən Arda cərimə meydançasına daxil olmadan qüvvətli zərbə ilə topu yaxın küncə göndərdi. Özü də işlək olmayan sağ ayağı ilə. Qapıçı əli ilə topa toxunsa da, qola mane ola bilmədi.

Arda bununla da 3,5 aylıq qol həsrətinə son qoydu. O, son qolunu yanvarın əvvəllərində İspaniya kubokunun 1/16 finalı çərçivəsində aşağı liqa təmsilçisi ''Minera'' ilə görüşdə vurmuşdu.

Ümumilikdə Türkiyə yığmasının üzvü bu mövsüm ''kral klubu''nda 37-ci rəsmi oyununu keçirdi. Onun aktivində 4 qol, 6 məhsuldar ötürmə var. Amma Arda bu 37 qarşılaşmanın yalnız 13-də start heyətində meydana çıxıb.

Maraq üçün bildirək ki, start heyətində şans qazandığı son 10 oyunda o, 7 qolun vurulmasında yaxından iştirak edib. ''Real''ın La Liqada ardıcıl 3-cü turda 1:0 hesabı ilə qalib gəlməsi diqqət çəkdi.

Maraqlıdı ki, son 33 ildə komandanın cəmi bir dəfə - 2020-nin iyulunda belə seriyası olmuşdu. Bundan başqa ''blankos'' bu mövsüm bütün turnirləri nəzərə almaqla cərimə meydançası kənarından 20-ci qolunu vurdu. Bu, ''böyük beşlik''də ən yaxşı göstəricidi.

Digər pillələrdə ''Barselona'' (18), ''Çelsi'' (16) və ''Mançester Siti'' (16) qərarlaşıb. La Liqada sona 5 tur qalmış ''Barselona''nın ''Real''ı 4 xal qabaqladığını bildirək.