Amerika hər yay olduğu kimi yenə mövsümöncəsi hazırlıq dönəmində ''El Klasiko''ya ev sahibliyi etdi.

İst Raterford şəhərindəki ''Metlayf'' stadionunda ''Real'' ilə ''Barselona'' üz-üzə gəldi. Qeyd edək ki, oyun 11-ci dəqiqədə ildırım çaxması üzündən dayandırıldı və təxminən yarım saat sonra davam etdirildi. Görüş ''Barsa''nın 2:1 hesablı qələbəsi ilə bitdi.

Ötən mövsümü ''Barselona''nın ikinci komandasında keçirən Pau Viktor bu hazırlıq dönəmində özünü yaxşı tərəfdən göstərir. Bir neçə gün öncə ''Mançester Siti''yə qarşı oyunda da qol vuran 21 yaşlı vinger bu dəfə dubl etdi. ''Real''ın yeganə qolunu isə Niko Pas vurdu. Madrid nəhənginin türkiyəli ulduzu Arda Gülər start heyətində meydana çıxdı və oyunu əvəzlənmədən sona qədər keçirdi. Komandasının məğlubiyyətinə baxmayaraq gənc yarımmüdafiəçi oyunu ilə diqqət çəkməyi bacardı. Ardanın 23-cü dəqiqədə vurduğu qol ofsayd üzündən qeydə alınmadı. Türkiyə yığmasının üzvü aktivinə məhsuldar ötürmə yazdı. Məhz onun künc zərbəsindən asması zamanı Niko Pas başla fərqləndi.

''Real'' ABŞ turnesində keçirdiyi 2-ci oyunda da məğlub oldu. İlk oyunda ''Kral klubu'' ''Milan''a minimal hesabla uduzmuşdu. Amma qeyd etmək yerinə düşər ki, Bellingem və Mbappe kimi ulduzlar hələ də komandanın düşərgəsində deyil.

ƏLİ