''Real'' yeni mövsüm üçün oyunçuların formalarının nömrələrini açıqlayıb.

Toni Kroos karyerasını başa vuraraq komandadan ayrıldığından nömrələrdə bəzi dəyişikliklər baş verib. Kroosun geydiyi ''8'' nömrəli forma ilə yeni mövsümdən etibarən Federiko Valverde oynayacaq. Valverde özü ''15'' nömrə ilə çıxış edirdi. Onun nömrəsi isə Arda Gülərə keçib. Gənc türkiyəli ulduz ''Real''da ilk mövsümündə ''24'' nömrəli forma altında çıxış edirdi. İyulun 16-da ''Santyaqo Bernabeu''da möhtəşəm bir tədbirlə Madrid publikası önündə rəsmi müqaviləyə imza atacaq Kilian Mbappe isə ''9'' nömrə ilə oynayacaq. Bundan başqa Kroosun ayrılmasından sonra yeni mövsümdə künc zərbələrini kimin yerinə yetirəcəyi də məlum olub. Arda Gülərin meydanda olmadığı anlarda künc zərbələrini Luka Modriç yerinə yetirəcək. Arda meydanda olarkən isə topa məhz o yaxınlaşacaq.

Yeri gəlmişkən, Arda Gülər ABŞ turnesinə qatılmayacaq. Klub tərəfindən rəsmi olaraq Mbappe, Kamavinqa, Çuameni, Mendi, Karvaxal və Bellingemin toplanışda iştirak etməyəcəyi açıqlanıb. Onlara AÇ-2024-dən sonra istirahət veriləcək. İspaniya mətbuatının iddiasına görə ''Real'' rəhbərliyi turnirdə Türkiyə yığması ilə 1/4 finala qədər irəliləyən Ardaya da əlavə istirahət hüququ verəcək. ''Real'' ABŞ-da avqustun 1-də ''Milan'', 4-də ''Barselona'', 7-də ''Çelsi'' ilə qarşılaşacaq.

ƏLİ