Türkiyə çempionatında 33-cü tura bu gün İstanbulda start veriləcək.

''Football-plus.az'' xəbər verir ki, ''Beşiktaş'' ''Hatayspor''u qəbul edəcək. İstanbul nəhəngi autsayder ilə oyunda superliqadakı 3 matçlıq qələbə seriyasına son qoymağa çalışacaq. ''Hatayspor''un durumu çox acınacaqlıdı. Son 4 turun hamısında məğlub olan və 18-ci pillədə qərarlaşan komandanı sona 6 tur qalmış xilasedici 15-ci pillədən 15 xal ayırır.

Aydın məsələdi ki, elitada qalmaq üçün möcüzəyə ehtiyac duyulacaq. Ancaq Hatay klubunun artıq bu həftə ''kitabı bağlana bilər''. Komanda bu turu da xalsız tamamlayacağı təqdirdə artıq riyazi cəhətdən də elitada qalmaq şansını itirəcək və ''Adana Dəmirspor''un ardından superliqa ilə vidalaşan ikinci klub olacaq. ''Hatayspor''un elita ilə vidalaşması mövzusu ətrafında daha bir maraqlı məqam var. Məsələ burasındadı ki, hataylılar turnirin tarixində elita ilə vidalaşmayan 7 kollektivdən biridi! Bu statusda olan digər klublar ''Qalatasaray'', ''Fənərbaxça'', ''Beşiktaş'', ''Trabzonspor'', ''Alanyaspor'' və ''Qaziantep''di. 2020/21-də ilk dəfə elitaya yüksələn və ən yuxarı divizionda 5-ci mövsümünü keçirən ''Hatayspor''un superliqa macərası beləcə başa çatmış olacaq. Maraqlıdı ki, 7 klubdan daha biri - ''Alanyaspor'' da bu mövsüm düşmə təhlükəsi yaşayır. Ancaq bu il ''Hatayspor'' ilə ''Alanyaspor'' ''aşağı düşsə'' belə, elita ilə heç vaxt vidalaşmayan klubların sayı elə olduğu kimi də qala bilər.

Bunun üçün bu mövsüm tarixində ilk dəfə elitada oynayan ''Eyüpspor'' ilə ''Bodrum'' superliqada yerini qorumalıdı. ''Eyüpspor'' zatən avrokuboklara vəsiqə uğrunda mübarizə aparır və bu mövsüm aşağı liqaya yuvarlanmayacağı dəqiqdi. Son turda ''Qalatasaray''a uduzmaqla düşmə zonasına geriləyən ''Bodrum''un isə taleyi öz əlindədi.