La Liqanın 33-cü turunda ''Real'' səfərdə ''Xetafe'' üzərində Arda Gülərin qolu sayəsində 1:0 hesablı çətin və vacib qələbə qazandı.

''Football-plus.az'' xəbər verir ki, oyun qalmaqalsız ötüşmədi. Qarşılaşmanın 78-ci dəqiqəsində Dani Sebalyos Arda Gülərin əvəzinə meydana çıxdı. Amma dəyişiklikdən dərhal sonra hakim oyunu dayandırmalı oldu. Belə ki, tribunadan ''Sebalyosa ölüm'' şüarları eşidildi. Hakimin tələbi ilə stadionun doktoru fanatlara müraciət edərək bu təzahüratları bir daha səsləndirməməyi xaiş etdi. Təxminən 1 dəqiqəlik fasilədən sonra oyun qaldığı yerdən davam etdirildi.

''Xetafe'' fanatlarının bu futbolçuya nifrəti 2016-cı ildə baş verən hadisə ilə bağlıdı. Sebalyos həmin vaxt ''Betis''in şərəfini qoruyurdu. 2015/16-nın son turunda ''Xetafe'' səfərdə ''Betis''ə uduzaraq La Liqa ilə vidalaşmalı olmuşdu. 9 sarı, 1 qırmızı vərəqənin göstərildiyi və çox gərgin keçən həmin qarşılaşmada Sebalyosun rəqibin bəzi futbolçuları, eləcə də məşqçilər korpusunun üzvləri ilə atışması olmuşdu. Futbolçu həmin vaxt ağzından ''ümid edirəm ki, aşağı liqada çürüyüb birdəfəlik məhv olacaqsız'' ifadəsini çıxarmışdı.

Göründüyü kimi illər keçsə də, ''Xetafe'' fanatlarının təcrübəli oyunçuya nifrəti soyumayıb. Ancaq onların bu hərəkəti ''Xetafe''yə baha başa gələ bilər. Hakim bu insidenti öz protokolunda qeyd etdiyindən Nizam-İntizam Komitəsinin bu hadisəni araşdıracağı gözlənilir. ''Xetafe''nin növbəti ev oyununda ''Kolizeum Alfonso Peres'' stadionunda bu şüarı səsləndirən tribunaya fanatların buraxılmayacağı istisna edilmir.