''Real''ın türkiyəli ulduzu Arda Gülərə bu il debüt etmək qismət olmayacaq.

"Football-plus.az" xəbər verir ki, bilindiyi kimi gənc futbolçu yayda ''Fənərbaxça''dan Madrid nəhənginə keçdikdən bu yana artıq 3 dəfə zədələnib. 18 yaşlı futbolçu artıq son zədədən qurtulub və ötən həftədən bu yana komanda ilə məşq edir. Arda Gülərin srağagünkü ''Vilyarreal''a qarşı oyunda adının iştirak ərizəsində olacağı gözlənilirdi. Amma belə olmadı. ''Kral klubu''nun 4:1 hesabı ilə qalib gəldiyi oyunun ardından baş məşqçi Karlo Ançelottiyə təbii ki, Arda Gülər haqda da sual ünvanladılar. Təcrübəli mütəxəssis isə türkiyəli ulduzun durumunun qaydasında olduğunu amma onun yeni ildən sonra şans qazanmağa başlayacağını bildirdi. Bu da o deməkdi ki, Arda 3 gündən sonra ''Real''ın ''Alaves''ə qarşı keçirəcəyi ilin son oyununda da iştirak ərizəsində olmayacaq. ''Real'' yeni ildə ilk oyununu isə yanvarın 3-də ''Malyorka''ya qarşı keçirəcək. Gülər ən yaxşı halda həmin görüşdə debüt edə biləcək.

Onu da bildirək ki, bu mövsüm Avropada zədələrdən ən çox əziyyət çəkən klublardan olan Madrid təmsilçisi daha bir pis xəbərlə sarsılıb. Belə ki, ''Vilyarreal''a qarşı oyunda zədələnən David Alabanın diz bağları qopub. Təcrübəli avstriyalı ulduz mövsümün sonuna qədər sıradan çıxıb!

ƏLİ