Dünən La Liqanın 35-ci turunda çempion ''Real'' artıq elita ilə vidalaşması rəsmiləşən ''Qranada''nın qonağı oldu.

Karlo Ançelotti növbəti dəfə heyətdə rotasiyaya əl atmışdı. Bunun sayəsində Arda Gülər də oynamaq şansı qazandı. Demək olar, ikinci heyətlə oynamasına baxmayaraq ''Kral klubu'' rəqibini 4:0 hesabı ilə darmadağın etdi. Madrid karyerasında ilk dəfə bir qarşılaşmada əvvəldən sona qədər meydanda qalan Arda növbəti qolunu vuraraq yenə türk dünyasını sevindirdi. Gənc ulduz fasilə ərəfəsində fərqlənərək hesabı 2:0 etdi. Gülər La Liqada 8-ci qarşılaşmada 3-cü qolunu vurdu. Onun bu 8 oyunda cəmi 255 dəqiqə meydanda olduğunu nəzərə alsaq, Arda orta hesabla hər 85 dəqiqəyə bir qol vurur! ''Real'' bu matçda bir sıra maraqlı göstəricilərə nail oldu. Məsələn, komanda La Liqada ardıcıl 29-cu oyunda uduzmamaqla şəxsi rekordunu yenilədi. Madrid nəhənginin daha öncə heç vaxt bir mövsümün gedişində bu cür seriyası olmamışdı. Bundan başqa ''Real'' bu mövsüm La Liqada 19-cu oyunda qapısını toxunulmaz saxlamaqla şəxsi rekordunu tekrarladı. Bunlardan 10-u Luninin, 7-si Arrisabalaqanın və 2-si Kurtuanın aktivindədi. ''Blankos'' daha öncə 1986/87 və 1987/88-də çempionatda 19 ''quru'' oyun keçirmişdi. Komanda qalan 3 turdan heç olmasa, birində qol buraxmasa, şəxsi rekordunu yeniləyəcək. Sonda onu da bildirək ki, ''Real'' ''Qranada''nı La Liqa çərçivəsində ardıcıl 16-cı qarşılaşmada məğlub etdi. Bu da rekord göstəricidi. Buna qədər Madrid nəhəngi heç vaxt çempionatda bir klub üzərində ardıcıl 16 qələbə qazanmamışdı.

ƏLİ