"Neftçi" ölkə kubokunun yarımfinal mərhələsinin cavab oyunu çərçivəsində "Sabah"la heç-heçə etdi (1:1, ilk oyun - 1:2).

"Football-plus.az" xəbər verir ki, "ağ-qaralar"ın baş məşqçisi Samir Abasov oyunsonrası mətbuat konfransında jurnalistlərin suallarını cavabladı.

- Azarkeşlərimizə təşəkkür edirəm. İlk dəfədi ki, səfər matçında bu qədər çox azarkeşimiz var idi. Onların dəstəyini hiss edirdik. Məğlubiyyətin bütün məsuliyyəti bizim boynumuzdadı. Uğursuzluğa görə bütün azarkeşlərimizdən üzr istəyirik. Baxmayaraq ki, çətin dönəmdə gəldik. Komandanı biz formalaşdırmamışıq.

- Heyətdəki futbolçuların 80 faizinə baxanda onların bu komandada forma geyməsi adamı heyrətləndirir. Yens Anderssonu görsəz, ona ürək sözləriniz olardı?
- Bu haqda danışmaq istəmirəm. Biz onunla bir yerdə işləməmişik. Oyuna qayıtmaq istəyirəm. Matça çox yaxşı köklənmişdik. İlk hissədə xeyli qol epizodu yaratdıq. Amma təsəssüf ki, qol vura bilmədik. Rəqibi hər cəhətdən analiz etmişdik. Əfsuslar olsun ki, sona qədər təzyiq göstərə bilmədik. Rəqib də çox yaxşı komandadı. Ola bilsin ki, bəzi komponentlərdə bizdən üstündülər. Soyunub-geyinmə otağında bəzi futbolçular ağrılara görə şikayətləndilər. Emin, Höccət, Koffi, Sek və Ştoqrin əvəzlənmək istədilər. Sonradan qalan hücumameyilli futbolçuları meydana buraxandan sonra fərq yarada bilmədik. Kaş ki, start heyətini sona qədər oynada bilərdik. Yayda həm klub, həm də biz tərəfdən veriləcək qərarlarla heyətdə dəyişikliklər ediləcək. Bu gün birinci hissədə göstərdiyimiz oyunu daim göstərə bilmək niyyətindəyik.

- Bassala Sambu cəzalı olmasaydı, bu gün finala vəsiqə qazana bilərdiz?
- Bəlkə də başqa cür ola bilərdi. Amma məğlubiyyətin məhz bu səbəbdən olduğunu düşünmürəm. Əlbəttə, Sambumnn qollar vurması bizi ümidləndirirdi. Onun heyətdə olması bizim üçün daha yaxşı olardı. Sambu yoxdusa, qalan hücumçular onun kimi oynamalıdı.

- "Qarabağ"la oyunda Darbo və Alekslə meydana çıxmışdız. Amma bu gün hücum xəttində fərqli heyət gördük. Bunun səbəbi nədi?
- Ağadadaş "Qarbağ"la oyunda ehtiyat oyunçular skamyasında əyləşsə də, zədəli idi. Düşündük ki, Sambu yoxdusa, onu layiqincə əvəz etməlidi.

- Məncə, heyətdə vaxtından gec dəyişiklik etdiz...
- Start heyətində meydana buraxdığım futbolçulara inanırdım. Onların sona qədər oynamağını istəyərdim. Birinci hissədə xeyli qol epizodu yaratdılar. Amma həmişə hər şey istədiyimiz kimi olmur. Meydana sonradan buraxdığımız futbolçular gözləntilərimi qarşılamadılar.

- Məsuliyyəti öz üzərinizə götürməyiniz nə dərəcədə ədalətlidi?
- Bəli, komandanı mən formalaşdırmamışam. Amma ən azı kubok matçında mənə inanan azarkeşlərin ümidlərini doğrultmalıydım. Buna görə bir daha üzr istəyirəm.

- Legionerlərin əksəriyyətinin müqavilə müddəti uzundu. Bu, sizin üçün problem ola bilərmi?
- Bundan xəbərdarıq. Klub rəhbərliyiylə danışmışıq. Bizim işimiz üçün rəhbərlik də əlindən gələni edir. İndi bu haqda danışmağın yeri deyil.

KƏNAN BAHADIR