"Neftçi" Misli premyer-liqasının səfərdə baş tutan 25-ci tur matçında "Kəpəz"ə uduzdu - 0:1.

"Football-plus.az" xəbər verir ki, "ağ-qaralar"ın baş məşqçisi Samir Abasov oyunsonrası mətbuat konfransında jurnalistlərin suallarını cavablandırdı.

- Niyə məğlub olduz?
- Çünki qol buraxsaq da, qol vura bilmədik. Fürsətlərdən istifadə edə bilmədik. Hücumçularımız "dişsizdilər". Xüsusilə, Ağadadaş... Oyuna yaxşı başladıq. Qol epizodları yaratdıq. Lakin son anda verilən qərarlar, futbolçuların keyfiyyəti qol vurmağa mane oldu. Bütün oyunlar önəmlidi. Turnir cədvəlində irəliləmək istəyirik.

- Qol buraxdığınız epizodu necə şərh edərdiz?
- Həmin anları tam xatırlamıram. Bundan əvvəl Ağadadaş başla zərbəylə fərqlənə bilərdi. Bacarmadı, ardınca hücuma keçən "Kəpəz" qol vurdu. Epizodu incələmək lazımdı.

- Sizə elə gəlmir ki, daha güclü müdafiəçilərə ehtiyacınız var?
- Bütün mövqelərə mənim istədiyim futbolçular lazımdı. Vəziyyəti başa düşürük. Bəzi oyunlarda futbolçuların fərdi səhvlərini komanda şəklində ört-basdır edə bilmişik. Mən hücumçulardan danışmaq istəyirəm. Ağadadaş bəzi şeyləri anlamalıdı. Azarkeşlər onun meydana çıxmasını istəyir. Amma Ağadadaş belə oyun tərziylə tərəfdarların gözləntilərini yerə vurur. Onun hücumçu olmağı hiss edilməlidi. Əlbəttə, məhz Ağadadaşı günahkar saya bilmərəm. Yaxşı epizodlar yaratdıq. Sadəcə, belə imkanları boşa vermək doğru deyil. Gəncsən, akademiyamızın yetirməmisən, amma səhvlərdən nəticə çıxarmaq lazımdı. Sonra gec ola bilər.

- Yuri Matias Braziliya mətbuatına müsahibəsində ailə məsələləriylə bağlı problemlərinin olduğunu deyib. Ümumiyyətlə, sanki Matias əvvəlki kimi deyil.
- Məndən əvvəlki Matias rəqibim idi. Onu tanımırdım. Matias elə futbolçudu ki, ailəsindəki vəziyyət nə məşqlərinə, nə də oyununa təsir edir. Durumdan xəbərdarıq. Matiasa istəkli çıxışlarına görə təşəkkür etmək lazımdı.

- Ötən matçdan sonra "VAR-ı rədd etmək lazımdı" ifadəsini işlətdiz. Ardınca hücumçunuz Bassalu Sambu ölkə kubokunda iki oyunluq cəza aldı. Düşünmürsüz ki, İntizam Komitəsi sizin əvəzinizə klubu cəzalandırdı?
- Məhz mənim sözlərimə görə belə qərar veriblər? Belədisə, daha nə oldu? Danışmayaq? Bəli, biz iki oyunluq cəzadan narazıyıq. Əvvəlki fikirlərimdə də qalıram. Bu mənim şəxsi fikrimdi. Mən "Goal-line" texnologiyasının tətəfdarıyam.

KƏNAN BAHADIR