“Qarabağ”ın Misli premyer-liqasının 33-cü turunda “Sumqayıt”ı qəbul edəcəyi matçdan etibarən ev oyunlarını “Azərsun Arena”da keçirəcəyindən xəbərdarsız. Cari mövsümdə sonuncu dəfə sentyabrın 29-da “Sabah”la görüşü bu idman qurğusunda keçirən Ağdam təmsilçisi 7 aydan sonra bura qayıdacaq.

Xəbər verdiyimiz kimi, komandanın “Azərsun Arena”ya dönməsinin səbəblərindən biri də Tofiq Bəhramov adına Respublika stadionunun öt örtüyünün ideal vəziyyətə gətirilməsi üçün işlərə başlanacağıyla bağlıdı. Ona görə ki, “köhlən atlar” avrokubokların 2025/26 mövsümündə də ev oyunlarını bu idman qurğusunda keçirəcək.
Avrokuboklarda yeni “futbol ili”nin iyulda başlayacağını nəzərə alsaq, qarşıda azı iki ay vaxt var.

Bəs, bu vaxt ərzində “Tofiq Bəhramov”da başqa işlərin görülməsi də planlaşdırılırmı?

Bu sualla “Qarabağ”ın mətbuat xidmətinin rəhbəri Anar Hacıyevə müraciət etdik. Klub rəsmisi “Football-plus.az”a açıqlamasında planda yalnız ot örtüyü ilə bağlı çalışmaların olduğunu bildirdi.

KƏNAN BAHADIR