“Qarabağ” PFL-ə ünvanladığı rəsmi müraciətdə “Azərsun Arena”da aparılan əsaslı təmir-bərpa işlərinə görə ev oyunlarını Tofiq Bəhramov adına Respublika stadionunda keçirməklə bağlı dəyişiklik edilməsini istəyib.

“Qarabağ”ın müraciətini, “Azərsun Arena”da aparılan işləri, Tofiq Bəhramov adına Respublika stadionunun mövsümün əvvəlindən Misli premyer-liqası üçün qəbul olunduğunu nəzərə alan PFL 6-cı turun “Qarabağ” - “Sabah” (tarix və saat eyni saxlanılmaqla) oyunundan etibarən “köhlən atlar”ın ev oyunlarını növbəti rəsmi bildirişə qədər Respublika stadionunda keçirməsinə qərar verib. Maraqlıdı ki, klub ötən ilin oktyabrında da “Azərsun Arena”nın ot örtüyündə renovasiya işləri aparıldığından adı çəkilən stadiona köçmüşdü. Görəsən, bu dəfə söhbət hansı təmir-bərpa işlərindən gedir? Suallarımızı “Qarabağ”ın direktoru Əmrah Çəlikələ ünvanladıq.

Klub rəsmisinin dediklərindən məlum oldu ki, arenada ehtiyat oyunçular üçün oturacaqlar qarşı tərəfə keçiriləcək. Bununla yanaşı, çəkilişin prosedurlara uyğun təmin edilməsi üçün qüllələr düzəldiləcək. Ot örtüyünün yaxşılaşdırılması üçün də bəzi işlər görülməlidi. Burda isə gübrələrdən istifadə olunacaq.

KƏNAN BAHADIR