30-cu turun “Turan Tovuz” - “Sabah” oyunu təkcə meydan sahiblərinin əzmkar qələbəsi, Kurban Berdıyevin karyerasında ilk dəfə qırmızı vərəqə görməsi ilə yadda qalmadı. İş ondadı ki, Tovuz stadionunda həm də carı mövsüm üçün azarkeş antirekordu yaşandı.

Həmişə azarkeş dəstəyi ilə seçilən “bozqurd”un yanında həmin gün cəmi 2500 adam var idi. Əlbəttə, Tovuza “Səbail” və ya “Şamaxı” gəlsəydi, belə zəif dəstəyi anlamaq olardı. Axı hər yerdə olduğu kimi, Azərbaycanda da rəqibin kimliyi dəstəyin miqyası baxımından böyük əhəmiyyətə malikdi. Amma Tovuza yerli komandanın ən ciddi rəqiblərindən “Sabah” təşrif buyurmuşdu.

Bəs niyə azarkeşlər bu oyuna biganəlik göstərdi, “Turan Tovuz”un yanında olmaq istəmədi? Bizə elə gəlir ki, tribunaların təxminən üçdəikisinin boş qalmasının bir yox, bir neçə səbəbi var. Burda Veysəl Rzayevin “Səbail”lə səfər oyunundakı hoqqası əsas götürülməlidi. Dünyanın heç bir yerində futbolçuların azarkeşlərlə münaqişəyə girməsi, dava-dalaş etməsi xoş qarşılanmır. Veysəl Bayılda tovuzlu azarkeşlərə hücum çəkməklə onları stadiondan perik saldı. Düzdü, klub rəhbərliyi azarkeşləri sakitləşdirmək üçün futbolçunun cərimələndiyini elan etdi. Amma komandanın lider futbolçularından birinin, məsələn, kapitan Şəhriyar Əliyevin araya girib barışdırıcı açıqlama verməsə, hətta Rzayevi tənbeh etməsi daha yaxşı yol olardı.

İkinci əsas səbəb nəticələrdəki qeyri-sabitlikdi. Komandanın son 5 oyunda cəmi 2 xal toplaması ən nikbin tovuzlu azarkeşlərin də ürəyincə deyildi. “Turan Tovuz” buna qədər keçirdiyi son üç ev oyununda məğlubiyyətlə barışmışdı. Üçüncü və sonuncu səbəb kimi hava şəraitini göstərmək olar. Havanın yağışlı və çox soyuq olması azarkeşləri evdə saxlamışdı. Bunlar bizim ehtimallar idi. Amma “Ultras Turan”ın rəhbərlərindən Kamal Saqqayevin də fikrini öyrəndik:

Bu məqamda “Turan Tovuz”un cari mövsümdəki ev oyunlarının statistikasına baxmaq da yerinə düşür. “Sabah”la oyuna qədər ən az azarkeş sayı 16-cı turun “Şamaxı” ilə oyununda (3:2) olmuşdu. Həmin oyunu cəmi 3000 azarkeş izləmişdi. Bu mənada ən yüksək göstərici 28-ci turun “Qarabağ”la oyununda qeydə alınıb. “Bozqurd”un ağdamlılarla qarşılaşmasında tribunalar doldu-daşdı və bəlkə həm də bu məqam yerli komandanı “yandırdı”. Acı məğlubiyyəti nəzərdə tuturuq.

“Turan Tovuz”un ev oyunlarında azarkeş sayı
2-ci tur. “Sumqayıt” - 1:0. 4500
5-ci tur. “Səbail” - 1:0. 5500
7-ci tur. “Araz-Naxçıvan” - 1:2. 5000
9-cu tur. “Zirə” - 1:0. 4000
11-ci tur. “Kəpəz” - 2:1. 3800
12-ci tur. “Qarabağ” - 0:0. 6000
14-cü tur. “Sabah” - 1:1. 4500
16-cı tur. “Şamaxı” - 3:2. 3000
18-ci tur. “Neftçi” - 1:1. 3500
21-ci tur. “Səbail” - 1:1. 5000
23-cü tur “Araz-Naxçıvan” - 1:0. 4100
25-ci tur. “Zirə” - 0:2. 4100
27-ci tur. “Sumqayıt” - 1:2. 4700
28-ci tur. “Qarabağ” - 1:4. 6500
30-cu tur. “Sabah” - 2:1. 2500

MÜZƏFFƏR QULUZADƏ