Okan Buruk Mourinyo ilə aralarında yaşananlara aydınlıq gətirdi
Məlum olduğu kimi, “Fənərbaxça”nın aprelin 2-də Türkiyə kubokunun 1/4 finalında öz meydanında əzəli rəqib “Qalatasaray”a 1:2 hesabıyla məğlub olaraq mübarizəni dayandırdığı qarşılaşmaya baş məşqçilər arasındakı münaqişə damğa vurmuşdu.
"Football-plus.az" xatırladır ki, Joze Mourinyo belə desək, bütün dünyanın gözü önündə Okan Burukun burnunu sıxmış və təcrübəli türkiyəli mütəxəssis acılar içində yerə yıxılmışdı.
Qalmaqalın səbəbi barədə bir neçə versiya var. Əsas versiya odu ki, Mourinyo final fitindən sonra hakimlərə irad bildirərkən Okan Buruk da ora yaxınlaşaraq ədalət təmsilçilərinə “ona fikir verməyin, oyunu yaxşı idarə etdiz” deyib. Məlum olduğu kimi, Buruk həmin matçın ardından keçirilən mətbuat konfransında olayı şişirtmək istəməmiş və bu haqda geniş danışmaqdan imtina etmişdi. Mourinyo isə “Trabzonspor”la oyundan sonra bu mövzuya toxunmuş və “onun özünü yerə atmasını “Hollivud” da izlədi” deyərək Okan Buruku belə desək, simulyasiya etməkdə suçlamışdı.
“Qalatasaray”ın çalışdırıcısı, nəhayət, bu hadisə ilə bağlı ilk dəfə geniş açıqlama verib. 51 yaşlı Buruk “Ekol TV” adlı “yutub” kanalına bunları deyib:
“Oyun bitəndən sonra hakimlərə minnətdarlığımı bildirmək üçün onlara tərəf yönəldim. Həmin vaxt “Fənərbaxça”nın məşqçisinin də onların yanında olduğunu gördüm. Ora sırf ona nəsə söyləmək üçün getmədim. Sadəcə, hakimlərə həm türk, həm də ingilis dilində “oyunu çox yaxşı idarə etdiz” dedim. Çox güman, məhz elə bu sözüm “Fənərbaxça”nın məşqçisinin xoşuna gəlmədi. Çünki o, həmin anda hakimləri tənqid edirdi. Ağzımdan başqa bir kəlmə çıxmadı. Hakimlərə “don`t listen to him” (onu dinləməyin) demədim. Sonra eşitdim ki, hakim raportunda mənim təxribata əl atdığımı yazıb. “Oyunu yaxşı idarə etdiz” sözünün təxribat kimi qiymətləndirməsi çox qəribədi. Nə üçün belə yazdığını bilmirəm. Hətta oyundan sonra bir yönəticimizin mənə söyləməsindən sonra bildim ki, hakim mənə sarı vərəqə göstəribmiş. Biz əzəli rəqibimizi onların meydanında yendik. Həm də onlarla çox ciddi bir çempionluq mübarizəsinin içindəyik. Bəli, sevindim və buna da haqqım çatır. Necə sevinməli olduğumu başqasından soruşmalı deyiləm. Rəqib baş məşqçini cırnatmaq və ya təxribata çəkmək kimi bir niyyətim qətiyyən olmayıb. Məqsədim bu deyildi. Sadəcə, qələbəni qeyd etdim. Nə vaxt və necə sevinəcəyimə mən özüm qərar verirəm! Əksinə, oyunun gedişində “Fənərbaxça”nın köməkçi məşqçisi 3-4 dəfə bizi təqhir etdi və təxribata çəkmək istədi. Yerə yıxıldığım olaya gəlincə, mənim həqiqətən də canım yandı. Buna görə də yerə yıxıldım. Məni futbol oynadığım dönəmdən tanıyanlar gözəl bilir ki, burnumda qırıq var. Qırıq burnun ağrısı başqa cür olur. Digər tərəfdən, fiziki şiddətə məruz qalan mən olmuşam. Amma bəziləri az qala həmin adama (Mourinyonu nəzərdə tutur – red.) “halal olsun” deyəcəklər. Mən həqiqətən də bu məsələni uzatmaq istəmədiyim üçün susdum. Həmin anda kənardan sənə bir toxunuşun olacağını gözləmirsən. Məni bilərəkdən yıxılmaqda günahlandıranlar var. Üzümə təmas olacağını mən harda bilirdim? Bir saniyənin üçündə yıxılmağa qərar verdim? Adam dırnağı ilə üzümü cızdı! Həmin an başqa cür davransam və ona cavab versəm, bəlkə də 10 oyunluq cəza alardım. İstənilən halda bir məşqçinin başqa məşqçiyə fiziki təmasının heç bir açıqlaması ola bilməz və olmamalıdı da! Məni üzən odu ki, çıxıb üzr istəmək əvəzinə daha da suyu bulandırırlar”.
Digər xəbərlər
