Mourinyo qələbəni Okan Burukun ''burnundan gətirdi''!
Xəbər verdiyimiz kimi, Türkiyə kubokunun 1/4 finalında ''Fənərbaxça'' ilə ''Qalatasaray'' üz-üzə gəldi. Joze Mourinyo yenə Okan Buruk ilə bacara bilmədi. ''Cim-Bom'' bu mövsüm çempionatda əzəli rəqibini səfərdə 3:1 məğlub etmişdisə, bu dəfə səfərdə 2:1 üstün olaraq yarımfinala yüksəldi.
Bu dəfəki derbi gərgin, qalmaqallı və qırmızı vərəqələrlə bol oldu. Xüsusilə son anlarda iki komandanın ehtiyat zonası arasında ciddi çaxnaşma yaşandığından hakim bir müddət oyunu dayandırmalı oldu. Həmin hay-həşirdə meydan sahiblərindən Mərt Hakan Yandaş, qonaqlardan isə Kərəm Dəmirbay ilə Barış Alpər Yılmaz qırmızı vərəqə aldı. Gərginlik final fitindən sonra da davam etdi və bu dəfə ''Fənər''dən Fred də qırmızı vərəqə aldı. Amma derbiyə damğa vuran əsas qalmaqal Joze Mourinyo ilə Okan Buruk arasında yaşandı. Həm oyundan öncə, həm də matçdan sonra bir-birinin əlini sıxmayan və bir-birini görən gözü olmayan bu ikili arasında yaşananlar dünya mətbuatının da gündəminə oturdu.
Portuqaliyalı mütəxəssis yandan Okan Buruka yaxınlaşaraq birdən onun burnunu sıxdı. Buruk isə yerə yıxılaraq acılar içində qıvrılmağa başladı. ''Qalatasaray''ın calışdırıcısı təxminən 10-15 saniyə yerdə uzandıqdan sonra ayağa qalxdı və əsəbi şəkildə Mourinyonu axtarmaq istədi. Amma ətrafdakılar onu sakitləşdirdi. Həmin ana qədər Mourinyo da artıq ordan uzaqlaşmışdı. Bu qalmaqallı görüntülər İspaniya, İngiltərə, Fransa mətbuatının idman mediasında da müzakirələrə səbəb oldu. ''Qalatasaray'' derbidən sonra bəzi paylaşımlarlarla rəqibini sancmağa çalışdı. Onların arasında xüsusilə ''pinokio'' paylaşımı diqqət çəkdi. ''Qalatasaray''ın ikinci başqanı Mətin Öztürk isə qalmaqal ilə bağlı sərt açıqlamalar verdi:
''Mourinyonun bu hərəkəti tək bizim məşqçimizə yox, bütövlükdə Türkiyə futboluna qarşı edilmiş bir hərəkətdi. Mourinyo bu cəsarəti hardan alır? Türkiyəni təhqir edir, ona cəza verən yoxdu. 4 oyunluq cəza alır, sonra da cəzası 2 oyuna endirilir. İndi də məşqçimizə əl-qol atdı. Ümid edirəm ki, federasiya nümayəndələri bu epizodu gördü. Mourinyo Türkiyəni nə zənn edir? Dünyanın hansı ölkəsində bu cür hərəkətə yol verə bilər? Ona federasiyadan öncə ''Fənər'' özü cəza verməlidi''.
Bu hərəkətinə görə qırmızı vərəqə alan portuqaliyalı məşqçinin hansı maddə ilə Nizam-İntizam Komitəsinə sövq ediləcəyi maraqla gözlənilir. Sövq ''idman prinsiplərinə zidd hərəkət'' maddəsi ilə olsa, onu 1-3 oyunluq cəza gözləyir. Amma sövq ''fiziki xəsarət yetirmək'' maddəsi ilə baş tutsa, Mourinyonu 5-10 oyun arası ağır bir cəza gözləyir.
