''Fənərbaxça''nın evdə ''Qalatasaray''a uduzaraq Türkiyə kubokunun 1/4 finalında mübarizəni dayandırdığı derbinin ardından Joze Mourinyonun Okan Burukun burnunu sıxması və sonuncunun yerə yıxılması Türkiyə futbol ictimaiyyətinin əsas gündəm mövzusu olmaqda davam edir.

''Football-plus.az'' xəbər verir ki, Mourinyo böyük hay-küyə səbəb olan bu hərəkətindən sonra qırmızı vərəqə aldı. İndi hər kəsi bir sual maraqlandırır: Okan Buruk hansı sözlə Mourinyonu təxribata çəkdi? Hər halda ünlü portuqaliyalı o dərəcədə özbaşına deyil ki, durduğu yerdə ''Qalatasaray''ın baş məşqçisinin burnunu sıxsın. Təbii ki, təxribat da olsa, heç bir halda Mourinyonun hərəkətinə haqq qazandırmaq mümkün deyil. Amma böyük ehtimalla bu qalmaqal birinci məhz Okan Burukun atmacasından sonra başladı. Elə Türkiyənin təcrübəli məşqçilərindən olan Yılmaz Vural da bildirib ki, hər iki məşqçi hakimlərin yanına yollanarkən Okan Buruk Mourinyoya söz atıb.

Türkiyənin tanınmış şərhçilərindən olan, hazırda ''TV 100'' kanalında çalışan Ərsin Düzən məşqçilər arasında yaşananlarla bağlı məlumat paylaşıb. Onun iddiasına görə Buruk hakimləri təbrik etmək üçün onların yanına yollanarkən orda Mourinyonu görüb. ''Fənər''in çalışdırıcısı hakimlərə öz etirazını bildirirmiş. Buruk isə Mourinyoya acıq vermək üçün ona ''very good refereeing'' (hakimlər yaxşı performans sərgilədi) dedi. Mourinyo da bunu eşitdikdən sonra Burukun üzərinə gedərək arxadan əli ilə onun burnunu sıxdı.

Okan Burukun mətbuat konfransında bu mövzunu malalamağa çalışması və heç bir sərt açıqlama verməməsi də onu göstərir ki, bu məsələdə o, süddən çıxmış ağ qaşıq deyil.