Okan Buruk Mourinyonun hərəkəti haqda nə dedi?
Türkiyə kubokunun 1/4 finalında ''Qalatasaray''ın səfərdə ''Fənərbaxça''nı məğlub etdiyi qarşılaşmanın ardından Joze Mourinyo ilə Okan Buruk arasında yaşananlar hələ uzun müddət gündəmdən düşməyəcək.
''Football-plus.az'' xəbər verir ki, Mourinyonun Okan Burukun burnunu sıxmasından sonra türkiyəli mütəxəssis üzünü tutaraq yerə yıxıldı. Bu, Mourinyonun məşqçi karyerasında öz həmkarına fiziki müdaxilə etdiyi ilk hal deyil.
2011/12-də ''Real'' ilə ''Barselona'' arasında baş tutan İspaniya superkubokunun cavab oyununda da Mourinyo barmağını Tito Vilanovanın gözünə soxmuşdu. Həmin vaxt portuqaliyalı mütəxəssis ''Real''ı çalışdırırdısa, Vilanova ''Barsa''da Xosep Qvardiolanın köməkçisi idi. Bu hadisədən 1 il sonra Mourinyo hərəkətinin yanlış olduğunu etiraf etmişdi.
Maraqlıdı ki, ''Fənər''dən hələ də heç kim derbidən sonra açıqlama verməyib. Mourinyo qırmızı vərəqə aldığı üçün mətbuat konfransında yer almadı. Okan Buruk isə aralarında baş verən qalmaqalı çox da şişirtmək istəmədi:
''Mən tərəfdən ona qarşı bir hərəkət olmadı. Mən sadəcə hakimi təbrik etmək üçün ora yollandım. Mourinyo da həmin an yanımdan keçirdi. Birdən arxadan əli ilə burnumu sıxdı. Üzümdə yüngül izi qalıb. Bunlar xoş şeylər deyil. Biz həmişə deyirik ki, oyunun içində qalmağa üstünlük veririk. Bu mövzunu çox da şişirtməyəcəm. Matçdan öncə də, sonra da məşqçilər olaraq bir-birimizin əlini sıxmalı idik. Amma bunlar olmadı. Bizim meydanımızdakı son derbi qolsuz yekunlaşmışdı. Həmin vaxt derbi maraqsız alındığı üçün və qol epizodlarının azlığı üzündən tənqid olunmuşduq. Bu gün fikrimcə, əksinə çox maraqlı və qol epizodları ilə bol olan bir derbi izlədik. Fiziki müdaxilənin düzgün olduğunu düşünməsəm də, dediyim kimi bu mövzuda çox açıqlama verməyəcəm''.
Digər xəbərlər
