Portuqaliya Futbol Federasiyasının İntizam Komitəsi ötən həftə baş tutan ''Portu'' - ''Benfika'' oyunu ilə bağlı cəzaları açıqlayıb.

''Football-plus.az'' xəbər verir ki, 28-ci turun mərkəzi oyununda ''Benfika'' səfərdə prinsipial rəqibini 4:1 hesabı ilə darmadağın etmiş və ''Sportinq''in xal itkisi sayəsində vahid liderliyə yüksəlmişdi. Baş məşqçisi Bruno Lajenin hərəkətinə görə Lissabon nəhənginə 408 avro cəza verilib. Belə ki, təcrübəli mütəxəssis komandasının 4-cü qolundan sonra tribunalara əli ilə ''4'' rəqəmini göstərmişdi.

''Portu'' fanatları da buna cavab olaraq qonaqların ehtiyat zonasına yad cisimlər atmışdılar. Amma əsas oyunu ''Portu'' ''Benfika''nın başına açıb. ''Əjdahalar'' rəqibi sözün əsil mənasında işıqsız qoyublar.

Həmin gün ''Draqao'' stadionunda qonaqlar üçün olan paltardəyişmə otağında işıq o qədər zəif olubmuş ki, göz-gözü görməyib. ''Benfika'' rəsmiləri yaranmış bu problemlə bağlı stadionun direktoruna məlumat veriblər. O, problemin stadionun işıq sistemi ilə bağlı olduğunu və tezliklə həll olunacağını desə də, bu, baş vermədi. ''Benfika''lılar məcburiyyətdən paltardəyişmə otağına fənər gətirməli oldular! Daha sonra bu klubun rəsmiləri problemin qeydə alınması üçün paltardəyişmə otağına matçın federasiya nümayəndəsini dəvət etdilər.

Maraqlıdı ki, bu problem matçın sonuna qədər yoluna qoyulmadı. NİK bu ''ağıllı'' addıma görə ''Portu''ya 1020 avro pul cəzası kəsib.