"Son 10 dəqiqədə, demək olar, fiziki baxımdan çatdırmadıq" - İCMAL
Ölkəmizin futzal yığması dünən AÇ-2026-nın əsas mərhələsi çərçivəsində son səfər oyununu keçirdi. 5-ci qrupda çıxış edən və qrupdan çıxmaq şansı qalmayan komandamız 5-ci tur çərçivəsində İsveç yığmasının qonağı oldu.
Səfərə zədə səbəbindən bir neçə əsas oyunçusuz yollanan yığmamız arenaya təşrif buyuran soydaşlarımızın dəstəyi ilə oyuna fəal başladı. Artıq 2-ci dəqiqədə rəqib iki dəfə meydanın mərkəzinə dəvət olundu: Oktay Rüstəmli dubl etdi. Birinci hissənin ortalarında meydan sahibləri fərqi minimuma endirsə də, 12-ci dəqiqədə yenidən yığmamız qol vurdu. Bu dəfə Rüstəm Bağırov millidə qol hesabını açdı. Düzdü, 15-ci dəqiqədə İsveç yenidən fərqi minimuma endirdi. Fasiləyə qədər komandamız azı iki dəfə də qol vurmaq imkanı qazandı. 2-ci hissəni daha çox müdafiədə keçirən futzalçılarımız hesabdakı üstünlüyü 37-ci dəqiqədə əldən verdi. Ardından meydan sahibləri oyun ərzində ilk dəfə hesabda önə keçdi. Sona qədər qapılara başqa qol vurulmadı və yığmamız uduzdu.
Turun digər matçında Xorvatiya evdə Yunanıstanı darmadağın edib - 6:0. Millimiz qrupda son oyunu aprelin 15-də Bakı idman Sarayında keçirəcək. Xorvatiya ilə oyun saat 20.00-da start götürəcək. Qeyd edək ki, hazırda Xorvatiya 15 xalla liderdi. Yunanıstan 7 xalla 2-ci, İsveç 4 xalla 3-cü, Azərbaycan 2 xalla sonuncu – 4-cü pillədədi.
Yığmanın baş məşqçisi Vitali Borisovun oyunla bağlı fikirləri:
“Matça yaxşı başladıq və ardıcıl iki qol vurduq. Fasiləyə qədər azı 2-3 epizodda da fərqlənə bilərdik. Birinci hissədəki çıxışdan razı qaldım. Düzdü, rəqib də iki qol vurdu. Topu itirdik və əks-hücumda yaxalandıq. İkinci hissədə isə “5-in 4-də” olan zaman müdafiə oluna bilmədik. Eyni səhvləri təkrarladıq. Bakıdakı oyunda onlar necə qol vurmuşdularsa, burda da onu təkrarladılar. Halbuki videobaxış zamanı göstərdik, necə oynamalı olduqlarını başa saldıq, məşq prosesində də üzərində işləyirdik. Söz tapmıram deməyə... Belə deyim də, əlimizdə olan bütün futzalçıları həmin mövqelərdə yoxlamışıq və nəticə ala bilmirik. Bir az da fiziki gücümüz çatmadı. Son 10 dəqiqədə, demək olar, fiziki baxımdan çatdırmadıq”.
İsveç – Azərbaycan 4:3 (2:3)
İsveç: 12. Martin Herlin, 9. Fredrik Söderqvist, 10. Petrit Zhubi (k), 13. Noraldin Azizi, 18. Hampus Furublad; 1. Tolga Ayranci, 2. İsmail Fazlija, 4. Viktor Mossberg, 7. Fehim Smajloviç, 8. Nima Kadivar, 11. Bryan Yohansson, 15. Qustav Rydberq, 16. Donat Qaşi, 19. Haidar Bejan.
Baş məşqçi: Matija Dulvat.
Azərbaycan 1. Emin Kürdov (k), 5. Oktay Rüstəmli, 7. Xəzər Ağalızadə, 10. Murad Quluzadə, 14. Tofiq Mikayılov; 12. Vladislav Reznov, 2. Rüstəm Bağırov, 3. Kənan Manafov, 4. Fərid Atakişiyev, 6. Mirzə Əmirov, 9. Emil Həsənzadə, 11. Eldar Zeynalov, 17. Nurlan Mehdizadə, 20. Novruz Kazıxanov.
Baş məşqçi: Vitali Borisov.
Qollar: O.Rüstəmli, 1:07 (0:1). O.Rüstəmli, 1:46 (0:2). F.Söderqvist, 10:23 (1:2). R.Bağırov, 11:50 (1:3). P.Zhubi, 14:59 (2:3). F.Söderqvist, 36:41 (3:3). D.Qaşi, 38:03 (4:3).
Vərəqə: F.Smajloviç, 36:54 - sarı.
Hakimlər: PETER NURSE, Jordan Griffits, Oliver Rodriguez-Ballinger (hamısı İngiltərə).
Hakim-inspektor: Boqdan Soresku (Rumıniya).
UEFA nümayəndəsi: Fabritsio Di Feliçe (İtaliya).
Timekiper: George Jansizian (İsveç).
11 aprel. "Helsinqborq Arena".
KƏNAN BAHADIR
Digər xəbərlər
