Canni de Byazi Astriya ilə oyundan fərqli meydana dörd yeni futbolçu buraxmışdı.

"Football-plus.az" xəbər verir ki, Eddi İsrafilov zədə səbəbindən, Yusif İmanov, Bəxtiyar Həsənalızadə və Ozan Can Kökçü isə zəif oyuna görə ilk “11-liy”ə salınmamışdı. Lakin italiyalı mütəxəssis yenə 4-3-3 sistemindən istifadə etmişdi. Bundan başqa, Toralın sağ, Ramilin sol cinah vingeri kimi oynaması qəribə idi. Buna baxmayaraq, komandamız ilk 30 dəqiqədə yaxşı mübarizə apardı. Daha çox Emin, Toral, Renat “üçlüy”ü diqqəti çəkirdi. Lakin kollektiv ümumilikdə hücum qurmaqda çətinlik çəkirdi. 30-cü dəqiqədəm sonra meydan sahibləri toparlana bildi. Əslində 29-cu dəqiqədə İsakın sayılmayan qolu bizimkilər üçün həyəcan təbili olmalıydı. Amma olmadı və meydan sahibləri 38-ci dəqiqədə Forsberqlə hesabı açdı. Əvvəlcə Cəfərquliyev hava mübarizəsində Dyekereşə uduzdu. Dyekereşdən ötürmə alan Forsberq aldadıcı hərəkətlərlə Höccət, Bəhlul və Riçardı işsiz qoyub qapıya zərbə vurdu. Balayevin görmə bucağı daralsa da, bu zərbənin qarşısını ala bilərdi. Əslində yığma qoldan sonra ruhdan düşmədi. Hissənin sonunda Bəhlul hesabı bərabərləşdirmək şansı qazandı. Ancaq bu müdafiəçi həmişə olduğu kimi, yenə də həlledici zərbəni dəqiq vurmaqda çətinlik çəkdi.

Gözləmək olardı ki, komandamız 2-ci hissəyə hesabı bərabərləşdirmək ümidi ilə çıxacaq. Təəssüf ki, tam bir fiasko izlədik. Futbolçularımız nə edəcəyini bilmirdi. Bu da meydan sahiblərinə sərf edirdi. Anderssonun komandası sürətli hücumlarla bizimkiləri çaş-baş salırdı. Belə məqamların birində - 65-ci dəqiqədə Bəhlul topu öz qapımıza göndərdi. 0:2 artıq oyunun taleyinin həll olunması demək idi. Bundan sonra millinin oyun sistemi tam pozuldu. Futbolçular ancaq meydanda gəzişirdi. De Byazi oyunun axarını dəyişmək üçün əvəzetmələrə əl atdı - Elvini Namik, Höccəti Cəlal əvəzlədi. “Şamaxı”nın üzvü karyerasında ilk dəfə müdafiənin sağında çıxış edirdi. Bu da əks-hücumlar zamanı səhvlər etməyimizə səbəb olurdu. 79-cu dəqiqədə Dyekereş belə məqamı boşa vermədi. Artıq komandamız nəzarəti tam əldən vermişdi. 88-ci dəqiqədə Karlsson möhtəşəm cərimə zərbəsindən fərqləndi. 1 dəqiqə sonra isə Elanqa hesabı biabırçı həddə çatdırdı. Yenə meydanın mərkəzindən oyuna başlaya bilməməyimiz başımıza bəla oldu. Cəlalın səhvindən sonra “Mançester Yunayted”in üzvü qarşılaşmada son nöqtəni qoydu.

Artıq əminliklə demək olar ki, yığmamız üçün Avropa çempionatının seçmə mərhələsi başlamadan bitib. İlk iki oyunda darmadağınlar, 9 buraxılan top başqa cür düşünməyə əlyeri qoymur. Onu da nəzərə alaq ki, qrupun daha bir nəhəngi Belçika hələ yığmamız önünə çıxmayıb. Bu qrupda bacara biləcəyimiz yalnız Estoniyadan xallar almaqdı. Estoniyadan xal almaq üçün yola De Byazi, yoxsa bir başqası ilə davam etməli olduğumuza isə artıq AFFA qərar verməlidi.

Bütün hallarda milli komandanın ölkədə qürur yox, nifrət obyektinə çevrildiyini, bu nifrətin gündən-günə dərinləşdiyini görmək çox ağır, kədərli mənzərədi. Bu biabırçılığa son qoyulmalıdı. Amma necə?!