Futzal yığmamız dünən DÇ-2024-ün elit mərhələsində ikinci oyununu keçirdi.

6 gün əvvəl hər iki komanda məğlub olduğuna görə oyunun gərgin keçəcəyi gözlənilirdi. Baş məşqçi Vitali Borisov Rumıniyaya məğlubiyyətdən sonra İsa Atayevi Maneka ilə əvəzləmişdi. Qapı bu dəfə Emin Kürdova tapşırılmışdı. Oyuna aqressiv başlayan yığmamız artıq 2-ci dəqiqədə hesabı açdı. Rəqib torunu silkələyən futzalçı Rafael Vilela oldu. Bundan sonra Felipinyonun zərbəsi tirdən döndüsə, Qallo hesabı dəyişdi - 2:0. Millimiz üçüncü qolu 15-ci dəqiqədə vurdu. Bu dəfə ilk dəfə rəsmi oyunda iştirak edən Maneka adını tabloya yazdırdı. Felipinyo da istəyinə çatanlar sırasında oldu və fərqi 4 topa çatdı. Fasiləyə 2 dəqiqə qalmış isə Vilela dublunu rəsmiləşdirdi. O, het-trik də edə bilərdi. Lakin son dəqiqədə 10 metrlik cərimə zərbəsini qola çevirə bilmədi. İkinci hissədə hesab 36-cı dəqiqədə dəyişdi. Bu dəfə Felipinyo dubl etdi. Rəqib sona 4 dəqiqə qalmış təsəlli qoluna imza atdı. Beləliklə, millimiz böyükhesablı qələbə qazandı.

DÇ-2024-ün elit mərhələ oyunu
A qrupu
Azərbaycan – Niderland 6:1 (5:0)
Azərbaycan: 1. Emin Kürdov (q, k), 6. Eduardo Borges, 9. Rafael Vilela, 10. Felipinyo, 14. Amadeu; 12. Rövşən Hüseynli (q), 4. Oktay Rüstəmli, 5. Maneka, 7. Hadi Ahmadi, 8. Novruz Kazıxanov, 11. Xətai Bağırov, 13. Everton Kardoso, 16. Xəzər Ağalızadə, 20. Amir Şocaei.
Baş məşqçi: Vitali Borisov.
Niderland: 12. David Stet (q), 4. Tevfik Ceyar, 5. Said Bouzambou, 6. Saber Ben Khalou, 10. Abdessamad Attahiri; 1. Manuel Kuyk (q), 2. Yordi Orriens, 7. Denzel Van Houtum, 8. Ayoub Boukhari, 11. Lahcen Bouyouzan, 14. İliass Bouzit, 15. İsmail Ouaddouh, 18. Qianni Tieboş, 20. Mohamed Cih.
Baş məşqçi: Migel Andres.
Qollar: R.Vilela, 1:19 (1:0). E.Kardoso, 7:47 (2:0). Maneka, 14:35 (3:0). Felipinyo, 17:04 (4:0). R.Vilela, 18:21 (5:0). Felipinyo, 35:45 (6:0). İ.Bouzit, 36:58 (6:1).
Vərəqələr: İ.Bouzit, 7:51. T.Ceyar, 9:09. E.Borges, 16:44. E.Kürdov, 36:58 – sarı.
Hakimlər: YİANQOS YİANQOU, Nikolas Nikolaou, Larisa Eleni Avramidou (hamısı Cənubi Kipr), Ramil Namazov (Azərbaycan).
Hakim-İnspektor: Sebastyan Staviski (Polşa)
UEFA nümayəndəsi: Avi Levi (İsrail)
20 sentyabr. Bakı İdman Sarayı.

KƏNAN BAHADIR