“Göyqurdlar”: “Oyunlar ya “Tofiq Bəhramov”da, ya da “Neftçi Arena”da keçirilməlidi”
Bilindiyi kimi, DÇ-2026-nın seçmə mərhələsinə hazırlaşan millimiz yayda növbəti yoldaşlıq oyunlarını keçirəcək. Yığmamız iyunun 7-də Riqada Latviya, 10-da isə evdə Macarıstan ilə qarşılaşacaq. Qəzetimizin ötən saylarından birində ikinci matçın harda keçirələcəyinin bəlli olduğunu yazmışdıq. Belə ki, komandamız rəqibini Mərdəkanda “Liv Bona Dea Arena”da qəbul edəcək.
Əlbəttə, AFFA-nın belə seçim etməsi birmənalı qarşılanmadı ki, bu da normaldı. Axı qurumun yeni rəhbərliyi futbolun kütləviləşdirilməsi və bölgələrdə təbliği siyasətinə uyğun addımlar atılacağını demişdi. İnsafən, qurumun bu yöndə ilkin addımlar atdığını xatırlatmalıyıq. Çünki yığmamız Rövşən Nəcəfin AFFA prezidenti təyin edilməsindən sonra rəqibləriylə paytaxtın, demək olar ki, mərkəzində yerləşən, insanların sıx məskunlaşdığı və gediş-gəlişin nisbətən asan olduğu Tofiq Bəhramov adına Repsublika stadionunda, Qəbələdə, Sumqayıtda – Mehdi Hüseynzadə adına şəhər stadionunda və Masazırda – “Bank Respublika Arena”da qarşılaşıb. Təbii ki, ortaya haqlı sual çıxır: bu dəfə niyə “Liv Bona Dea Arena”?
Bu yöndə danışarkən, ölkə kubokunun ötən mövsümkü finalında, yəni “Qarabağ” – “Zirə” qarşılaşmasında, millimizin bu idman qurğusunda keçirdiyi matçlarda və “Araz-Naxçıvan”ın ev oyunlarında qeydə alınan tamaşaçı saylarını xatırlamaq yerinə düşər. Yalnız “köhlən atlar”la “qartallar”ın duelində anşlaq yaşanıb ki, onda da stadion tam dolmayıb (5500 tamaşaçı). Ümumiyyətlə, mövsüm ərzində “qırmızı-ağlar”ın xeyli ev oyununa yerində şahidlik edən idman jurnalisti kimi bildirməliyəm ki, burda xeyli tribuna nəniki toz basıb, quru palçıqdı, palçıq! Bu məsələyə cavabdeh olan şəxslər oyundan əvvəl satılan bilet saylarından xəbərdar olduqları üçün oturacaqları təmizləməyə belə ehtiyac duymur! Stadionda tablo yoxdu! Düzdü, iyunun 7-nə qədər bu və başqa problemləri aradan qaldırmaq mümkündü. Amma AFFA niyə matçın bölgələrdə, heç olmasa, paytaxtın daha mərkəzi yerlərində keçirilməsinə çalışmadı? DÇ-2026 kimi mötəbər turnirə hazırlıq mərhələsində daha azarkeşin dəstəyinə, sevgisinə ehtiyac görülmür? Bəlkə bəzi tərəfdarların Haitidən 4-cü qolu vurmasını tələb etməsi, Belarusun qələbə bayramına qoşulması qurumu küsdürüb? Hər halda, bu yöndə cavabsız sual çoxdu və məkanın bundan sonra dəyişdirilməsi yönündə hansısa addım atılacağına inanmaq çətindi. Bu bizim mövqeyimiz.
Bəs yığmanın əsas azarkeş qrupu “Göyqurdlar” məsələyə necə yanaşır? Matçın Mərdəkanda keçirilməsi komanda ilə azarkeşlər arasında olan bağın daha da incəlməsinə səbəb ola bilərmi? Ümumiyyətlə, Macarıstanla matçın “Liv Bona Dea Arena”da keçirilməsi düzgün seçimdimi? Fanklubun rəhbəri Elnur Şərifli qəzetimizə açıqlamasında qərarı belə şərh etdi:
“Biz AFFA rəhbərliyinə dəfələrlə bildirmişdik ki, millimizin oyunlarının keçirildiyi stadion seçimi azarkeşlərin iştirakı üçün son dərəcə vacibdi. Açıq şəkildə demişdik: tribunaları doldurmaq istəyirsizsə, oyunlar ya Tofiq Bəhramov adına Respublika stadionunda, ya da “Neftçi Arena”da keçirilməlidi. Santuşla görüşümüz zamanı o da bizə açıq demişdi ki, millinin bazası “Liv Bona Dea Arena”nın yanında yerləşdiyi üçün onlar üçün logistika baxımından həmin stadion daha əlverişlidi. Mərdəkandakı stadion bizim üçün üçüncü seçim idi, amma yenə də şükür edirik. Çünki Sumqayıt və Masazırda yerləşən stadionların vəziyyəti doğrudan da biabırçı idi. Şəxsən mən özüm həyatımda Masazırdakı stadion kimi həm “yeni”, həm də uçqun vəziyyətində olan idman qurğusu görməmişdim. O stadion, ümumiyyətlə, “qara siyahıya salınmalıdı”. Orda milli komanda adına oyun keçirmək, sadəcə, hörmətsizlikdi. Görünür ki, səsləndirdiyimiz irad və təkliflər nəzərə alınıb, nəticədə “Liv Bona Dea Arena” seçilib. Bura bizim üçün yad yer deyil. 2010-cu ildən bu stadionda çox sayda oyunda iştirak etmişik. Ən möhtəşəm xatirələrimizdən biri isə “Neftçi” –APOEL matçında, “Sector 11” tribunasında yaşadığımız atmosfer idi”.
Elnur bəy Mavcarıstanla oyunda qələbə qazanmağın vacibliyindən də danışdı:
“Ümumiyyətlə, bu il bizim üçün xüsusi əhəmiyyət daşıyır: Macarıstanla keçiriləcək matç həm də tribunaya addım atmağımızın 15 illiyini qeyd edəcəyimiz oyun olacaq. “Sektor 11” 2010-cu ilin iyununda quruldu və bunu ilk dəfə məhz sizin qəzet yazdı: “11-ci sektorda “Sektor 11” banneri açıldı, ancaq səbəbini başa düşə bilmədik”. Bir müddət fasilədən sonra 2023-cü ildə “Göyqurdlar” adıyla tribunaya qayıtdıq və bu dəfə daha güclü və məqsədyönlü şəkildə irəliləyirik. Ona görə Macarıstanla matç bizim üçün, sadəcə, bir oyun yox, bayram ab-havasında tribunaya dönüş rəmzi olacaq. 15 il ərzində tribunada bərabər dayandığımız dostlarımızla birlikdə bu ruhu yenidən yaşayacağıq. Əlavə olaraq, macar azarkeşlərlə eyni tribunada olmaq istəyimizi AFFA-ya çatdırdıq. Macarlar bizim qardaşlarımızdılar. Onlarla eyni tribunada olub komandalarımıza bərabər dəstək vermək bizim üçün xoş olar. Millimizə sevgimiz sonsuzdu. Sevməsək, nəticələr də vecimizə də olmazdı. Sevgi isə həm də tələbkarlıq gətirir: insan sevdiyindən gözlənti içində olur, səhvlərini düzəltməsini istəyir. Oyunçularla aramızda çox açıq və səmimi danışıqlar olub. Onlar artıq bizdən nə gözlədiklərini yaxşı bilirlər. Bizim yolumuz birdi: komandanı ayağa qaldırmaq! Və buna nail olana qədər də onlardan əl çəkməyəcəyik. Həmişə dediyimiz kimi: bayrağın izində!”
KƏNAN BAHADIR
Digər xəbərlər
