“Dəstək baxımından da bu stadionlar daha uyğundu” - AÇIQLAMA
Milli komandamız Millətlər Liqasında ardıcıl 3-cü qələbəsini qazandı.
Canni de Byazinin yetirmələri son matçda ilk oyunda səfərdə uduzduğu Qazaxıstanı evdə 3 cavabsız qolla yendi. Belarus və Slovakiya üzərində qələbələrdən sonra son görüşdə azarkeş sayının artacağını gözləyirdik. Lakin “Dalğa Arena”da komandanı cəmi 2950, yəni azarkeş dəstəklədi. Deməli, 10 milyonluq ölkədə əhalinin cəmi 0,03 faizi yığmaya maraq göstərir.
Bu isə yetərincə azdı. Azarkeş sayının az olmasının əsas səbəbi matçın səhərdən uzaq məsafədə yerləşən “Dalğa Arena”da keçirilməsidi. Halbuki millinin oyunlarını Bakıda təşkil etmək üçün bir neçə variant var. Amma AFFA nədənsə Mərdəkada yerləşən stadiona üstünlük verir.
Görəsən, azarkeşlər millinin matçlarının hansı stadionda keçirilməsini istəyir? Bu sualla Azərbaycan Azarkeşlər Birliyinin rəhbəri Atanur Cəfərliyə müraciət etdik: "Düzdü, oyunda azarkeş sayı az idi. Təbii ki, buna matçın Mərdəkanda keçirilməsi də təsir edir. İnsanların ora gedib-gəlməsi problemdi. Baxmayaraq ki, AFFA azarkeşlərin stadiona getməsi üçün şərait yaradır. Amma yenə də bu məsələ müəyyən qədər problemdi. Bəli, millinin oyunlarının Tofiq Bəhramov adına Respublika stadionunda keçirilməsini istəyərdik. “Bakcell Arena” da yaxşı varinatdı. Lakin “Dalğa Arena”da keçirilməsinin də özəlliyi var. Komandamızın əvvəlki oyunları Bakı Olimpiya Stadionunda baş tuturdu. Bura da əslində uyğun deyil. Çünki stadion çox böyük olduğuna görə ora gələn 10 min azarkeş də az görünür. Amma bu sayda azarkeş "Tofiq Bəhramov"da, “Dalğa Arena”da və “Bakcell Arena”da olanda daha çox görünür və böyük dəstək yaranır. Oyunların “Dalğa Arena”da keçirilməsinin səbəbi “Formula-1” idi. Millinin bir neçə matçı Azərbaycan "Qran-pri"sinin vaxtına düşdü. Bütün qarşılaşmalar üçün eyni stadion göstərilməli olduğuna görə “Dalğa Arena” seçildi. Lakin bir azarkeş kimi istəyərəm ki, milli komandamızın oyunları “Bakcell Arena” və ya “Tofiq Bəhramov”da keçirilsin. Bu həm azarkeşlər üçün rahatdı, həm də "Tofiq Bəhramov" daha doğma məkandı. Dəstək baxımından da bu stadionlar daha uyğundu. Amma böyük ehtimalla milli yenə Bakı Olimpiya Stadionuna qayıdacaq. Bütün azarkeşlərin adından danışmaq istəmirəm, amma bura heç də ürəyimizcə olan məkan deyil".
ŞAİR ABDULLA
