Pyolisiz “Milan” əzəli rəqibinə yenə uduzmadı! - ŞƏRH
Aprelin 2-də İtaliya kubokunun yarımfinalının ilk oyunları çərçivəsində ikinci duelin həyəcanı yaşandı. Əlbəttə, Milan klublarının bu mərhələdə bir-birinə rəqib olması cəlbedici olsa da, buna təəssüflənənlər də az deyil. Hər necə olsa, finala lombardiya təmsilçilərindən yalnız biri çıxacaq.
Qeyd edək ki, reqlamentə əsasən, turnirin yarımfinalına qədər olan bütün mərhələlərin qalibləri biroyunluq mübarizə nəticəsində müəyyən edilib. Mövsümün həlledici mərhələsində azarkeşlərini yalnız bu ilin əvvəlində ölkə superkubokunu qazanmaqla sevindirən “Milan”dan mövsümü üç kubokla başa vurmaq şansını saxlayan “İnter”ə qarşı ilk oyunda daha bir hünər göstərmək tələb olunurdu. Məsələ ondadı ki, “qırmızı-qaralar” Stefano Pyolinin baş məşqçi vəzifəsindən istefaya göndərilməsindən sonra “qara-göylər”ə qarşı müxtəlif turnirlərdə keçirdikləri 3 oyunda 2 qələbə və 1 heç-heçəyə nail olmuşdular. Halbuki Pyolinin baçılığı altında keçən əvvəlki 6 (!) derbidə “İnter” qalib gəlmişdi. Serjio Konseysaonun “Milan”ın başında ikinci sınağında əzəli rəqibi 3:2 hesabıyla məğlub edərək superkuboku qazandığını xüsusi vurğulayaq.
“İnter”in cari mövsümün 4-cü derbisinə çox sayda itki ilə çıxdığını da qeyd edək. Simone İnzaqinin ilk dəqiqələrdən meydana çıxardığı heyət “Milan” üçün bir qədər əlverişli sayıla bilərdi. İlk hissədə qapılar qarşısında kifayət qədər təhlükəli epizodlar yarandı. Lakin qapıçıların inamlı oyunu fasiləyə qədər hesabın açılmasına mane oldu. İkinci hissənin lap əvvəlində Abraham nominal ev sahibi sayılan “Milan”ı hesabda önə keçirdi. “İnter”in buna reaksiyası çox aqressiv oldu. Menyan Barellanın zərbəsini dəf etsə də, Çalhanoğlu 66-cı dəqiqədə topu yerlə qapının küncünə yönəltdi. İtaliyanın son çempionu qalan vaxtda qələbəyə çox yaxın oldu. Ancaq Menyan Zalevski ilə Mxitaryanın zərbələrinə əla reaksiya verdi. Beləliklə, Pyolisiz “Milan” əzəli rəqibinə ardıcıl 4-cü derbidə də uduzmadı!
yarımfinal, ilk oyunlar
Milan - İnter 1:1
Abraham, 47 - Çalhanoğlu, 66.
Milan: Menyan, Ernandes, Qabbya, Tiav, Uoker, A.Ximenes, Fofana (Bondo, 88), Reynders, Pulişiç (Feliş, 76), Leao (Çukvueze, 88), Abraham (S.Ximenes, 76).
İnter: X.Martines, Bissek (Pavar, 59), De Vrey (Açerbi, 79), Bastoni, Darmian, Auqusto (Zalevski, 59), Barella, Çalhanoğlu, Frattezi (Mxitaryan, 59), Korrea (Berenbruk, 90+1), M.Türam.
Bu mərhələnin digər oyununun nəticəsi: Empoli - Bolonya 0:3 (Orsolini, 23. Dallinqa, 29; 51).
Cavab oyunları aprelin 23-24-də keçiriləcək.
Oyundan sonra
Serjio Konseysao, “Milan”ın baş məşqçisi:
“Nəticənin ədalətli olduğunu düşünürəm. Komandamıza əla dəstək verən fanatlara təşəkkürümü bildirirəm. Futbolçularımız güclü rəqibə qarşı balanslaşdırılmış oyun sərgilədilər. Müdafiədə ağıllı oynamaq tələb olunurdu və biz belə də etdik. “İnter”in hesabda önə keçmək şansının çox olduğunu deməzdim, bizim şansımız daha çox oldu. Ümumilikdə isə oyun bərabər səviyyədə keçdi. Belə vacib matça münasibətimizdən çox razı qaldım. “Napoli”yə qarşı əvvəlki oyunun ikinci hissəsində də ağıllı və diqqətli oyun göstərmişdik. Finala çıxmaq və kuboku qazanmaq üçün işə belə yanaşmanı davam etdirməliyik”.
Simone İnzaqi, “İnter”in baş məşqçisi:
“Bu derbidi. İlk hissədə De Vrey ilə Frattezinin hesabı açmaq imkanları oldu. Fasilədən sonra isə bunu “Milan” bacardı. Hesabda geri düşməyimizin bizə faydalı olduğunu düşünürəm. Ona görə ki, ikinci hissəni daha yaxşı keçirdik. Çətin rəqibə qarşı oyunda kifayət qədər təhlükəli vəziyyətlər yaratdıq. Menyan Zalevski ilə Mxitaryanın zərbələrinə əla reaksiya verdi. Futbolçularımızın lazımi nəticə üçün özlərini necə fəda etməsi xoşuma gəldi. Sərəncamımda yalnız 14 sahə oyunçusu vardı. Bu səbəbdən futbolçulardan bir qədər dişlərini sıxmağı xahiş etmişdim. 48 saatdan sonra Parmaya yollanmalıyıq. Bu səbəbdən səmərəsiz riskə gedə bilməzdik. Yarımfinalda ilk oyuna çıxdığımızı bilirdik. Üç həftə sonrakı cavab görüşünə daha çox oyunçu ilə çıxacağımıza ümid edirəm”.
Digər xəbərlər
