A seriyasının 33-cü turuna lider mövqeyində başlayan “Milan” qələbəsizliyə son qoyub.

Komandanın İtaliya çempionatında ardıcıl iki qolsuz heç-heçədən sonra qol vurması və qələbə qazanması ilk növbədə vurğulanmalıdı. “Qırmızı-qaralar”ın rəqibi “Cenoa” uzun müddətdi A seriyasında qalmaq uğrunda yarışır. “Milan” genuyalıları iki cavabsız qolla məğlub etdi. Stefano Pyolinin komandası A seriyasında artıq 6 oyundu top buraxmır. “Milan” çempionatda qapısında sonuncu dəfə topu fevralın 25-də keçirilən “Udineze” ilə matçda (1:1) görüb. Pyolinin komandası 1971/72 mövsümündə ardıcıl 7 oyun top buraxmayan Nereo Rokkonun və 1993/94 mövsümündə bu planda 7 və 9 oyunluq seriya ilə seçilən Fabio Kapellonun “Milan”ının yolu ilə gedir.

“Rossonyerlər”in ölkə çempionatında məğlubiyyətsiz seriyasının 11 oyuna (6 qələbə, 5 heç-heçə) çatdığını da qeyd edək.