“Milan” üçün yeni rekord

“Milan”ın 2022/23 mövsümü üçün maliyyə hesabatı açıqlanıb. Bu planda vəziyyət yetərincə normallaşıb.

İtaliya klubu son 17 ildə ilk dəfə maliyyə ilini qazancla başa vurub. Bu məlumat “Milan”ın direktorlar şurasının sentyabrın 27-də keçirilən iclasında açıqlanıb. Klubun ötən mövsümü 6 milyon avro qazancla başa vurduğu məlum olub. Maraq üçün qeyd edək ki, “Milan” 2021/22 mövsümünü 66,5 milyon avro zərərlə bitirmişdi. Klub 2006-cı ildən sonra ilk dəfə maliyyə ilində müsbət saldoya nail olub. Bu planda həmin il qeydə alınan göstəricinin təxminən 2,5 milyon avroya bərabər olduğunu da xatırladaq.

Son mövsümdə gəlirlərin ümumi məbləği 400 milyon avrodan bir qədər çox olub. Bu, “Milan” üçün yeni rekorddu. Xatırladaq ki, Stefano Pyolinin çalışdırdığı komanda 2022/23 mövsümündə A seriyasını 4-cü yerdə başa vurmuş və Çempionlar Liqasının yarımfinalına qədər irəliləmişdi.