“Düzü, mətbuat konfransında belə qalmaqalların yaşanmasını heç də pis qarşılamıram. Əksinə, daha maraqlı olur. Sadəcə, hər iki tərəf öz səviyyəsini gözləməli, uyğunsuz ifadələr işlətməməlidi. Təəssüf ki, bəzi hallarda həm media nümayəndələri, həm də baş məşqçilər etik qaydalara riayət etmir. Belə qalmalların olması mümkündü. Onsuz da burda hər iki tərəf eyni statusda olmur. Jurnalist hücum, baş məşqçi işini, özünü və komandasını müdafiə edən şəxs olur. Belə hadisələrə dünya təcrübəsində də rast gəlinir. Əslində bu halların yaşanmaması daha pis hadisələrlə nəticələnə bilər. Bəzən bu məsələlərdə aşırı reaksiya göstərənlər də olur. Məsələn, Samir Abbasov... O, son bir neçə mətbuat konfransında eyni açıqlamalar verməklə məşğuldu. Media nümayəndələrinin hansısa məqsədinin olduğunu, sualların nə üçün verildiyini bildiyini deyir. Düzdü, bu ifadəni Samir bəyə aid etmək istəmirəm. Məqsədim onu xain adlandırmaq deyil. Amma söz var ki, xain xoflu olar. Bunu sözgəlişi deyirəm. Bəlli məsələdi ki, kim nə edibsə, qarşısındakı adamın da həmin şeyi etdiyini düşünür. Samir Abasov “Sumqayıt”dan “Neftçi”yə necə, kimlərin vasitəsilə gəldi? İndi kimləri müdafiə edir? Bu məsələlərin hamısı qaranlıq qalıb. Bunun arxasında nəsə gizlənir. Ona görə həmişə kimisə suçlayır, hansısa məqsədinin olduğunu deyir. Ümumiyyətlə, insan özü necədisə, qarşısındakı şəxsi də elə görür. Kaş ki, bu yöndə daha sivil danışmaq mümkün olaydı. Məsələn, “Sumqayıt”ın baş məşqçisi Vaqif Cavadov da eyni səhvi etdi. Lakin bir-iki turdan sonra anladı ki, mətbuatla belə danışmaq olmaz və səhvini düzəltdi. Ümid edirəm ki, Samir Abasov da səhvini düzəldəcək. Sanki o, “Neftçi”nin uğursuz nəticələrini şou tipli açıqlamalarla ört-basdır etməyə çalışır. Gah “martın 22-si düzələcək” açıqlamasıyla gündəm yaradır, gah da belə... Nəticədə “Neftçi”nin oyunu yaddan çıxır. Samir Abasova sonuncu mətbuat konfransında istefa verməsiylə bağlı ünvanlanan sual normal idi. Həqiqətən də, ölkənin ən yaxşı büdcəyə malik klubunun bu vəziyyətdə olması heç də yaxşı hal deyil. Belədə ona, təbii ki, belə suallar verilməlidi. Sadəcə, baş məşqçi komandanın uğursuzluğunu öz şoularıyla unutdurur. Əlbəttə, onun da bəzi sözlərində haqq var. Baş məşqçiyə vaxt verilməsinin vacibliyindən xəbərdarıqsa, o da belə mütəxəssislərdən biridi. Sadəcə, Samir Abasov bu müddət ərzində özünü məşqçi kimi göstərməlidi, şoumen kimi yox. Hələ ki meydanda onun formalaşdırmaq istədiyi komandanın işartıları görünmür. Mənə elə gəlir ki, bunun üçün çox böyük vaxtı da olmayacaq. Bu mövsüm yalnız ölkə kubokunun finalına yüksəlməklə nəsə qazana bilər. Növbəti “futbol ili”ndə isə ilk turlardan etibarən iddiasını ortaya qoymalıdı. Təbii ki, media nümayəndələriylə baş məşqçilər arasındakı münasibətlər zamanla yoluna düşəcək. Lakin Samir Abasov danışıqlarına diqqət etməli, klub da bunu ondan tələb etməlidi. Hər halda, nə yaxşı ki, belə qalmaqallar var”.