“Əslində bu, komandadaxili məsələdi. Samir Abasov “Neftçi”nin təklifini qəbul edəndə bütün problemlərdən xəbərdar idi. Yəqin ki, bu mövzuyla bağlı da götür-qoy edib. Kapitan sarğısıyla bağlı mövzu hazırda tapmaca kimidi. Sarğını daşıyan futbolçu start heyətində meydana çıxmalıdı. Emin Mahmudova veriləcəksə, deməli, o, formada olmalı, komandasına xeyir verməlidi. Bu üzdən qərar veriləndə mənfi və müsbət tərəfləri araşdırılmalıdı. Baş məşqçiyə nəticə lazımdı. Belədə hansı futbolçu daha faydalı çıxış edirsə, ona güvənməyə məcburdu. Samir Abasovun bu baxımdan da işi çətin olacaq. Ona görə ki, heyəti özü formalaşdırmayıb. Baş məşqçini qəliz proses gözləyir. Belə ab-havada radikal qərarlar vermək, addımlar atmaq əks yöndə də effekt verə bilər. Məncə, sarğı məsələsi sonranın işidi. İndi “Neftçi” quyudadı. Əvvəlcə komandanı quyudan çıxarmaq lazımdı. Hələ bu prosesin özü xeyli vaxt aparacaq”.