''Beşiktaş'' bu mövsüm qəribə qrafik cızmaqda davam edir.

''Football-plus.az'' xəbər verir ki, komanda ölkə çempionatında çempionluq mübarizəsindən çoxdan çəkilib. Eləcə də Avropa Liqasında da pley-offdan kənar qalaraq mübarizəni çoxdan dayandırıb.

''Ağ-qaralar''ın yalnız ölkə kubokunda iddiası davam edir. İstanbul nəhəngi superliqada iddiasız rəqiblərlə oyunlarda tez-tez büdrədiyi üçün zirvədən bu qədər geri qalıb. Amma komanda ciddi rəqiblərlə oyunlarda sanki fərqli simaya bürünür. ''Qalatasaray'' üzərində qazanılan 2:1-lik qələbə bu mövzunu yenidən aktuallaşdırdı.

Təkcə bir faktı vurğulayaq ki, ''Beşiktaş'' bu mövsüm superliqada ilk ''5-lik''də yer alan klublara qarşı oyunlarda ən çox xal toplayan kollektivdi! ''Qartal'' bu cür rəqiblərə qarşı keçirdiyi 7 oyundan 5 qələbə, 1 heç-heçə, 1 məğlubiyyətlə ayrılaraq 16 xal toplayıb! Yeganə məğlubiyyət ilk dövrədə ''Qalatasaray''la səfərdə keçirilən oyunda qeydə alınıb (1:2).

İlk 5 pillədə yer alanlara qarşı ən çox xal toplayanların siyahısında ''Qalatasaray'' (6 oyun, 3 qələbə, 2 heç-heçə, 1 məğlubiyyət) 11 xalla 2-ci, ''Eyüpspor'' (6 oyun, 1 qələbə, 2 heç-heçə, 2 məğlubiyyət) 5 xalla 3-cü, ''Fənərbaxça'' (6 oyun, 4 heç-heçə, 2 məğlubiyyət) 4 xalla 4-cü və ''Samsunspor'' (6 oyun, 3 heç-heçə, 3 məğlubiyyət) 3 xalla 5-ci pillədə qərarlaşıb. ''Beşiktaş'' tək çempionatda yox, digər turnirlərdə də iddialı rəqiblərlə oyunlarda yaxşı təsir bağışlayıb.

Bu məqamda mövsümün əvvəlində superkubokda ''Qalatasaray'' üzərində qazanılan 5:0-lıq tarixi qələbəni xatırlatmaq yerinə düşər. Bundan başqa Avropa Liqasında səfərdə ''Lion'' (1:0), evdə ''Atletik''lə (4:1) oyunlarda da önəmli qələbələr əldə olunub.