Ötən həftə Türkiyə superliqasının ilk turu start götürdü.

Oyunlarda baş verən maraqlı məqamları diqqətinizə çatdırırıq:

* “Trabzonspor” 2016-dan bəri ilk dəfə mövsümün birinci turunda qol buraxmadı. 6 il öncə komanda “Kasımpaşa”nı 2 cavabsız qolla yenmişdi.

* Kornelius 2001/02-dən bəri mövsümün açılış qolunu vuran ilk “Trabzonspor”lu oldu. 21 il öncə bunu “Beşiktaş”la oyunda Zəfər Dəmiray bacarmışdı.

* “Fatih Karagümrük”lə “Alanyaspor”un duelində iki italiyalı mütəxəssis – Andrea Pirlo ilə Françesko Farioli üz-üzə gəldi. Türkiyə çempionatında sonuncu dəfə eyni ölkəni təmsil edən iki əcnəbi məşqçinin duelinə 2003/04-də “Beşiktaş” – “Samsunspor” oyununda rast gəlinmişdi. O vaxt “Qartal”ı rumıniyalı Mirça Luçesku, samsunluları isə onun həmyerlisi Cici Multesku çalışdırırdı.

* “Beşiktaş” ilk turu öz meydanında keçirdiyi son 7 mövsümün hamısına qələbə ilə başlayıb.

* “Beşiktaş” superliqada 95-ci dəqiqədən sonra qol vurduğu son 3 matçın hamısını “Kayserispor”a qarşı keçirib!

* “Qalatasaray”ın superliqada “Antalyaspor”a qarşı məğlubiyyətsiz seriyası 13 oyuna çatdı (9 qələbə, 4 heç-heçə). Bu rəqib önündə son məğlubiyyət 2015/16-nın 2-ci dövrəsində qeydə alınıb (2:4).

* Okan Buruk məşqçi kimi “Antalyaspor”a qarşı keçirdiyi 9 superliqa matçının heç birində məğlubiyyət acısı yaşamayıb (6 qələbə, 3 heç-heçə).

* Muslera superliqada qapısına vurulan son 2 penaltini dəf edib. Luis Adrianodan öncə ötən mövsüm “Fatih Karagümrük”lü Peşiç də təcrübəli qapıçını məyus edə bilməmişdi. Ümumilikdə Muslera peşəkar karyerasında 19-cu dəfə penalti qaytardı.
* “Qalatasaray” son 7 mövsümün 6-na qələbə ilə başlayıb. Komanda bu dönəmin 1-ci turlarında yalnız 2019-da “Dənzilispor”a məğlub olub (0:2). Ümumilikdə “Qalatasaray” Türkiyə çempionatında 65 mövsümün 45-nə qələbə ilə başlayıb (8 heç-heçə, 12 məğlubiyyət).

ƏLİ