Xəbər verdiyimiz kimi ''Beşiktaş'' Türkiyə Futbol Federasiyasının ''Qalatasaray''la derbiyə əcnəbi hakim təyin etməmək qərarına etiraz əlaməti olaraq dünyaca ünlü bir sabiq hakimi Türkiyəyə dəvət etməyi planlaşdırırdı.

"Football-plus.az" xəbər verir ki, bu hakim artıq Türkiyədədi. Söhbət Urs Mayerdən gedir.

''Beşiktaş''ın rəsmi sosial şəbəkə səhifələrində sabiq isveçrəli hakimin ''Tüpraş Stadionu''ndakı şəkili paylaşılıb. Şəkilin altında isə ''siz gətirmədiz, biz gətirdik! Dünyaca ünlü sabiq hakim Urs Mayer ''Tüpraş Stadionu''nda'' ifadəsi qeyd olunub.

Mayer klub prezidenti Sərdal Adalı ilə birlikdə oyunu VİP lojadan izləyəcək. Onun şübhəli epizodlarla bağlı şərhləri ''ağ-qaralar''ın ''yutub'' səhifəsində paylaşılacaq. Bundan başqa onun oyunun gedişində də bəzi fikirləri dərhal rəsmi sosial şəbəkə səhifələrində paylaşılacaq.

1959-cu il təvəllüdlü Mayer yeni nəsil futbolsevərlərin tanıdığı isimlərdən deyil. 1989-cu ildə FİFA hakimi statusu alan Mayer 2004-cü ilə qədər peşəkar karyerasını davam etdirib. Düzdü, o, həm klub, həm də yığma səviyyəsində nəhəng turnirlərdə final idarə etməyib. Amma həm Çempionlar Liqasında, həm dünya çempionatı, həm də Avropa Çempionatında önəmli qarşılaşmalarda fit sahibi olub. Məsələn, DÇ-2002-nin yarımfinalında Almaniya - Cənubi Koreya matçını məhz bu hakim idarə etmişdi. Qətiyyətli olması və oyun qaydalarına bağlılığı ilə tanınırdı.

Mayer İngiltərədə də kifayət qədər populyardı. Amma mənfi mənada. AÇ-2004-ün 1/4 finalında 120 dəqiqəsi 2:2 hesabı ilə bitən və Portuqaliyanın İngiltərəni oyunsonrası penaltilər seriyasında məğlub etdiyi tarixi oyunun hakimi məhz Mayer idi. Onun əsas vaxtın son saniyələrində ingiltərəli Sol Kempbellin qolunu qeydə almaması İngiltərədə çox böyük söz-söhbətlərə və etiraza səbəb olmuşdu. Həmin oyundan sonra Mayerin şəxsi məlumatları paylaşılmış və ingilislər ona minlərlə təhdid məktubu göndərmişdilər.

''San'' nəşrinin əməkdaşları isə Portuqaliyaya yollanmış və Mayerin evinin önünə nəhəng bir İngiltərə bayrağı sancmışdılar. O matçdan sonra bir müddət polislərin qoruması altında yaşamalı olan ünlü hakim elə həmin il yaşı ilə əlaqəli olaraq karyerasını başa vurmuşdu. Mayer iş dünyasında da populyardı. Onun İsveçrədə bir neçə şirkəti var.