Dünyaca ünlü sabiq ingiltərəli futbolçu, ABŞ təmsilçisi ''İnter Mayami''nin sahibi Devid Bekhem hazırda Türkiyədədi.

''Football-plus.az'' xəbər verir ki, Bekhem reklam çəkilişində iştirak etmək üçün bazar ertəsi oğlu Romeo və onun sevgilisi Kim Ternbull ilə birlikdə İstanbula gəlib.

49 yaşlı Bekhemin dünən ''Beşiktaş''ın qadınlardan ibarət komandasını ziyarət etməsi diqqət çəkib. ''Hakkı Yeten'' bazasına gələrək xanımlarla görüşən sabiq ulduz onlarla həm selfi çəkdirib, həm də imza paylayıb. Romeo Bekhem isə sevgilisi ilə birlikdə ''Kapalı Çarşı''nı ziyarət edib.

O, 4 milyon təqibçisi olan ''instaqram'' səhifəsinin hekayə bölümündə şəkil paylaşaraq üzərinə Türkiyə bayrağını əlavə edib. Devid Bekhem bu gün səhər saatlarında İstiqlal küçəsində baş tutan bir tədbirə qatılıb. Tədbirin bitimində oranı tərk etmək istəyərkən böyük izdihamla qarşılaşıb. Amma səmimi hərəkətləri ilə diqqət çəkən ünlü isim heyranların istəyini geri çevirməyərək onlarla bol-bol şəkillər çəkdirib.

Daha sonra isə maşınına əyləşərək ordan uzaqlaşıb. Hələ ki, ''instaqram'' səhifəsində Türkiyə səfəri ilə bağlı paylaşım etməyən Bekhemin qardaş ölkədə neçə gün qalacağı bilinmir.

ƏLİ