''Beşiktaş'' ilə ''Qalatasaray'' arasında şənbə günü baş tutacaq derbinin hakiminin yerli, yoxsa, əcnəbi olacağına aydınlıq gəlib.

“Football-plus.az” xəbər verir ki, çərşənbə axşamı bu mövzunu və ümumiyyətlə, növbəti prinsipial matçlara əcnəbi hakimlərin dəvət olunub-olunmaması məsələsini müzakirə etmək üçün dünən federasiyanın idarə heyətinin toplantısı keçirildi.

Türkiyə mətbuatının yazdığına inansaq, idarə heyətindəki səsvermə zamanı səslər bərabər oldu. Yəni əcnəbi hakimin həm lehinə, həm də əleyhinə olan komitə üzvlərinin sayı bərabər oldu. Belədə bütün məsuliyyəti federasiya prezidenti İbrahim Hacıosmanoğlu üzərinə götürdü. Zatən mövsümün qalan hissəsində əcnəbi hakim dəvət etməyin tərəfdarı olmayan Hacıosmanoğlu məhz bu yöndə də qərar verdi.

Onun fikrincə, əcnəbi hakim yenidən dəvət olunsa, artıq bunun qarşısını almaq mümkün olmayacaq. Amma Hacıosmanoğlu indi bu qərarı ilk növbədə ''Beşiktaş''a izah etməlidi. Çünki ''Beşiktaş'' artıq neçə müddətdi, ''Qalatasaray''la derbiyə əcnəbi hakimin dəvət olunması üçün dəridən-qabıqdan çıxırdı.

Elə klub saytında yerləşdirilən son bəyanatda da ''ədalətsizliyin altına imza atmayın'' ifadəsi qeyd olunmuşdu. Derbini idarə etməyə əsas namizəd olan yerli hakimlər isə Mehmet Türkmən, Cihan Aydın və Atilla Karaoğlandı. Ən son İrlandiya - Bolqarıstan oyununda zədələnən Xəlil Umut Meleri fasilədə Mehmet Türkmən əvəzləmiş və kifayət qədər yaxşı idarəçilik nümayiş etdirmişdi.

Zədəsini müalicə etdirməklə məşğul olan Melerə isə bu həftə oyun verilməyəcək. Onun aprelin 2-də Türkiyə kubokunun 1/4 finalında baş tutacaq ''Fənərbaxça'' - ''Qalatasaray'' derbisini idarə edəcəyi gözlənilir.