Derbinin hakimi ''Beşiktaş'' camiəsində əsas gündəm mövzusu olmaqda davam edir.

''Football-plus.az'' xəbər verir ki, Türkiyə Futbol Federasiyası şənbə günü keçiriləcək ''Beşiktaş'' - ''Qalatasaray'' derbisinə yerli hakimi - Yasin Kolu təyin edib. Halbuki ''ağ-qaralar'' israrla əcnəbi hakim, hətta elə bir neçə həftə öncə ''Qalatasaray'' - ''Fənərbaxça'' derbisini idarə etmiş Slavko Vinçiçi tələb edirdilər. Bu olay TFF ilə ''Beşiktaş''ın münasibətlərini gərginləşdirib.

Bu arada Türkiyə mətbuatının xəbərinə görə ''Beşiktaş'' derbi üçün qeyri-adi bir plan hazırlayıb. Belə ki, ''Qartal'' artıq karyerasını başa vuran futbol dünyasının önəmli hakimlərindən birini ''Tüpraş Stadionu''na dəvət edəcək. Həmin sabiq hakim VİP zonada oyunu klub prezidenti Sərdal Adalı ilə birlikdə izləyəcək. Final fitindən sonra həmin hakimdən derbidəki bütün şübhəli epizodlarla bağlı açıqlamalar alınacaq. Daha sonra həmin açıqlamalar ən qısa müddətdə ''Beşiktaş''ın ''yutub'' kanalına yerləşdiriləcək. Elə onun matçın gedişindəki şərhləri də klubun sosial şəbəkələrdəki rəsmi səhifələrində paylaşılacaq.

İstanbul nəhənginin planlaşdırdığı bu yeniliyin hansı effekt verəcəyi böyük maraq doğurur.